ન્યૂયોર્કના ચેનાંગો કાઉન્ટીમાં $૨૦૦,૦૦૦ના ફ્રોડ કેસના આરોપમાં 23 વર્ષીય ભારતીય નાગરિક તુષાર શર્માની ધરપકડ કરાઈ હતી. શર્માને કોર્ટમાં રજૂ કરાયો હતો અને પછી મુક્ત કરાયો હતો. કોર્ટે તેને ન્યૂયોર્ક સ્ટેટમાં રહેવાનો આદેશ કર્યો હતો. શર્માને 20 એપ્રિલના રોજ બેઈનબ્રિજ ટાઉન કોર્ટમાં હાજર કરાશે.
ન્યૂ યોર્ક સ્ટેટ પોલીસના જણાવ્યા અનુસાર કેલિફોર્નિયામાં રહેતા એક ભારતીય નાગરિકની સોમવારે ચેનાંગો કાઉન્ટીમાં એક કથિત છેતરપિંડીની યોજનાની તપાસ સાથે જોડાયેલા ગુનાહિત આરોપોમાં ધરપકડ કરાઈ હતી. આ ફ્રોડમાં એક પીડિત સાથે $200,000ની છેતરપિંડી કરવામાં આવી હતી.
તુષાર શર્મા સામે ફ્રોડના કેટલાંક ગંભીર આરોપ મૂકવામાં આવ્યાં છે. આ ધરપકડ એક ફ્રોડની તપાસના ભાગરૂપે થઈ હતી. તેમાં વ્યક્તિઓને ખોટી રીતે જાણ કરવામાં આવે છે કે તેઓ “વોરંટ પર વોન્ટેડ” છે અને ધરપકડ ટાળવા માટે તાત્કાલિક પૈસા ચૂકવવા પડશે. સ્કેમર્સ સામાન્ય રીતે ફોન, ટેક્સ્ટ અથવા ઇમેઇલ દ્વારા પીડિતોનો સંપર્ક કરે છે.
ઘણીવાર તેઓ કાયદા અમલીકરણ, કોર્ટ અધિકારીઓ અથવા સરકારી એજન્સીઓના અધિકારીઓ તરીકે પોતાને રજૂ કરે છે. તેઓ દાવો કરે છે કે પીડિત પર દંડ બાકી છે અથવા તેની સામે ધરપકડ વોરંટ છે અને પીડિતને વિવિધ પદ્ધતિઓ દ્વારા ચુકવણી કરવા દબાણ કરે છે.
