લૂસિયાના અને ટેક્સાસમાં વિવિધ પોલીસ એજન્સીઓ દ્વારા સંકલિત તપાસ પછી આંતરરાજ્ય સોનાના કૌભાંડમાં વૃદ્ધ પીડિતો સાથે છેતરપિંડી આચરનારા ન્યૂજર્સીના એક ભારતીય યુવકની ધરપકડ કરવામાં આવી હતી.
ન્યૂજર્સીના પારસિપ્પનીના રહેવાસી 25 વર્ષીય નિગમ ભટ્ટ વર્ક વિઝા પર અમેરિકામાં રહે છે, તેની ખંડણીના આરોપમાં અટકાયત કરવામાં આવી હતી. 7 એપ્રિલના રોજ લૂસિયાનામાં ટાંગીપાહોઆ પેરિશ શેરિફ ઓફિસ, કોલિન કાઉન્ટી (ટેક્સાસ) શેરિફ ઓફિસ અને વોશિંગ્ટન પેરિશ શેરિફ ઓફિસ સાથે સંકળાયેલી એક કાર્યવાહીમાં તેની અટકાયત કરવામાં આવી હતી. કોલિન કાઉન્ટીના ડીટેક્ટીવ્ઝ દ્વારા લૂસિયાનાના અધિકારીઓને મલ્ટિ સ્ટેટ ફ્રોડ સ્કીમ અંગે સતર્ક કરવામાં આવ્યા પછી આ કેસ બહાર આવ્યો હતો. આ કૌભાંડમાં પીડિતોને ખોટું જણાવવામાં આવ્યું હતું કે, તેમના બેંક એકાઉન્ટસ અને વિવિધ સોશિયલ સીક્યુરિટી લાભ અટકાવવામાં આવ્યા હતા. પછી કૌભાંડીઓ દ્વારા પીડિતોને તેમની મિલકત મુક્ત કરાવવા માટે ફંડને સોનામાં તબદિલ કરવા જણાવ્યું હતું. પોલીસે કેન્ટવૂડ વિસ્તારના એક સહિત અનેક વૃદ્ધ પીડિતોની શોધ્યા હતા. પોલીસે નિગમ ભટ્ટની ગતિવિધિઓ અંગેની ગુપ્ત બાતમીના આધારે તે સ્થાનિક પીડિત પાસેથી વધુ 800,000 ડોલરનું સોનું મેળવી લે તે પહેલાં જ તેને પકડી લીધો હતો.
