અમેરિકાના મૂન મિશનમાં નાસાના સીનિયર અધિકારી એવા ભારતીય અમેરિકન વૈજ્ઞાનિક અમિત ક્ષત્રિયનું મહત્ત્વનું યોગદાન રહ્યું છે. હ્યુસ્ટનમાં બાળપણમાં રોકેટ લોન્ચીંગ જોવાથી લઈને નેશનલ એરોનોટિક્સ એન્ડ સ્પેસ એડમિનિસ્ટ્રેશન (NASA)માં મહત્ત્વપૂર્ણ કામગીરી કરવા સુધીની સફરમાં,અમિત ક્ષત્રિયએ ચંદ્ર પર અવકાશયાત્રીઓને ઉતારનાર સ્પેસ એજન્સીમાં નોંધપાત્ર યોગદાન આપ્યું છે. વિસ્કોન્સિનમાં જન્મેલા નાસાના એસોસિયેટ એડમિનિસ્ટ્રેટર અમિત ક્ષત્રિય એજન્સીમાં સર્વોચ્ચ પદે કાર્યરત છે અને એડમિનિસ્ટ્રેટર જેરેડ આઇસેકમેનના સીનિયર સલાહકાર પણ છે. તેઓ એજન્સીના 10 સેન્ટર ડાયરેક્ટર્સનું નેતૃત્ત્વ કરે છે અને વોશિંગ્ટનમાં નાસા હેડક્વાર્ટરમાં મિશન ડાયરેક્ટોરેટ એસોસિયેટ એડમિનિસ્ટ્રેટર્સના પણ વડા છે. તેઓ એજન્સીના ચીફ ઓપરેટિંગ ઓફિસર તરીકે પણ કાર્યરત છે. પ્રથમ પેઢીના ભારતીય ઇમિગ્રન્ટ માતા-પિતાને ત્યાં જન્મેલા અમિત ક્ષત્રિયએ કેલિફોર્નિયાના પાસાડેનામાં કેલિફોર્નિયા ઇન્સ્ટિટ્યૂટ ઓફ ટેકનોલોજીમાંથી ગણિતમાં બેચલરની અને ઓસ્ટિનની યુનિવર્સિટી ઓફ ટેક્સાસમાંથી ગણિતમાં માસ્ટર ઓફ આર્ટ્સની ડિગ્રી મેળવી હતી. તેમનો જન્મ વિસ્કોન્સિનના બ્રૂકફિલ્ડમાં થયો હતો, પરંતુ તેઓ ટેક્સાસમાં હ્યુસ્ટનના સબર્બ કેટીને પોતાનું વતન માને છે. અમિત ક્ષત્રિયએ નાનપણ હ્યુસ્ટનમાંથી સ્પેસમાં લોંચિંગ જોયું હોવાથી તેમની આ ક્ષેત્રમાં રૂચિ વધી હતી. હ્યુસ્ટનમાં જોન્સન સ્પેસ સેન્ટર ખાતે નાસાના મિશન કંટ્રોલનું સંચાલન થાય છે.
