ભારતનું ફોરેક્સ રીઝર્વ 3 એપ્રિલે પૂરા થયેલા સપ્તાહમાં 9.063 બિલિયન ડોલર વધીને 697.121 બિલિયન ડોલર થયું છે. રીઝર્વ બેન્કે શુક્રવારે આ ડેટા જાહેર કર્યા હતા. અગાઉના સપ્તાહે ફોરેક્સ રીઝર્વ 10.288 બિલિયન ડોલર ઘટીને 688.058 બિલિયન ડોલર થયું હતું. 27 ફેબ્રુઆરીએ એટલે કે ઈરાન યુદ્ધ શરૂ થયું તેના એક દિવસ પહેલાં ફોરેક્સ રીઝર્વ 728.494 અબજ ડોલરની ઐતિહાસિક ટોચ પર હતું. 3 એપ્રિલે પૂરા થયેલા સપ્તાહમાં ફોરેન કરન્સી એસેટ્સ 1.784 બિલિયન ડોલર વધીને 552.856 બિલિયન ડોલર થઈ હતી. ફોરેન કરન્સી એસેટ્સ ડોલર ટર્મમાં દર્શાવાય છે જે ડોલર સિવાયની કરન્સી જેમ કે યુરો, પાઉન્ડ, યેન સામે રૂપિયામાં થતી વધ-ઘટની અસર દર્શાવે છે. ગોલ્ડ રીઝર્વ 7.221 બિલિયન ડોલર વધીને 120.742 બિલિયન ડોલર થયું હોવાનું આરબીઆઈએ કહ્યું હતું. સ્પેશ્યલ ડ્રોઈંગ રાઈટ્સ 5.8 કરોડ ડોલર વધીને 18.707 બિલિયન ડોલર થયા હતા. ઈન્ટરનેશનલ મોનિટરી ફંડ (IMF) સમક્ષ ભારતનું રીઝર્વ અગાઉના સપ્તાહનું 4.816 બિલિયન ડોલર યથાવત્ રહ્યું હતું.
