નોર્થ લંડનના ગોલ્ડર્સ ગ્રીનમાં યહૂદી સમુદાયની એમ્બ્યુલન્સોને આગ લગાવવાના કેસમાં ચાલી રહેલી આતંકવાદ વિરોધી તપાસમાં ધરપકડ કરવામાં આવેલા કુલ શંકાસ્પદ લોકોની સંખ્યા છ થઈ છે. ગત તા. 4 એપ્રિલ, 2026 ના રોજ, પોલીસે છેલ્લા શંકાસ્પદ તરીકે 19 વર્ષીય યુવાનની ધરપકડ કરી હતી. ત્રણ અન્ય શંકાસ્પદ લોકોની કોર્ટ સુનાવણીમાં હાજરી આપનાર શંકાસ્પદ યુવાનને આગ લગાડવાના હુમલામાં ભાગ લેનાર તરીકે પોલીસ અધિકારીઓએ ઓળખી કાઢ્યો હતો અને તેના પર જીવનને જોખમમાં મૂકવાના ઇરાદાથી આગ લગાડવાનો આરોપ મૂકવામાં આવ્યો છે.
સોમવાર, 23 માર્ચની વહેલી સવારે ગોલ્ડર્સ ગ્રીનમાં યહૂદી ઇમરજન્સી સેવા હાત્ઝોલાની ચાર એમ્બ્યુલન્સને આગ લગાવવામાં આવી હતી. જોકે મેટ્રોપોલિટન પોલીસે હજુ સુધી આ ઘટનાને ઔપચારિક રીતે આતંકવાદી કૃત્ય જાહેર કર્યું નથી, પરંતુ કાઉન્ટર ટેરરિઝમ પોલીસિંગ (CTP) લંડન યુનિટે ગુનાના વિશેષ સ્વભાવ અને કોમી સલામતી પર તેની અસરને કારણે તપાસની આગેવાની લીધી છે. કાનૂની કાર્યવાહી ચાલુ છે
શનિવારે ત્રણ અન્ય પ્રતિવાદીઓ હમઝા ઇકબાલ (ઉ.વ. 20, લેટન), રેહાન ખાન (ઉ.વ. 19, લેટન) અને વોલ્થમસ્ટોના 17 વર્ષનો બેવડી બ્રિટિશ-પાકિસ્તાની નાગરિકતા ધરાવતો પુરુષ કોર્ટમાં હાજર થયા હતા. જે ત્રણેયને કસ્ટડીમાં મોકલવામાં આવ્યા છે અને શુક્રવાર, 24 એપ્રિલે ઓલ્ડ બેઇલી ખાતે હાજર થવાનું રહેશે. 25 માર્ચે અગાઉ ધરપકડ કરાયેલા બે અન્ય પુરુષો વધુ પૂછપરછ માટે જામીન પર છે.
પાસઓવર ઉત્સવ દરમિયાન વધેલી સુરક્ષા
યહૂદી સમુદાય હાલમાં પાસઓવર તહેવાર ઉજવી રહ્યો છે, ત્યારે ડિટેક્ટીવ ચીફ સુપરિન્ટેન્ડેન્ટ લ્યુક વિલિયમ્સે પુષ્ટિ આપી છે કે “બેસ્પોક પોલીસિંગ યોજના” અમલમાં છે. જે અંતર્ગત નોર્થ વેસ્ટ લંડનના સંવેદનશીલ વિસ્તારોમાં સશસ્ત્ર પોલીસ પેટ્રોલિંગ સહિત પોલીસ અધિકારીઓની સંખ્યામાં નોંધપાત્ર વધારો થાય છે.
CTP લંડનના વડા કમાન્ડર હેલેન ફ્લાનાગને જણાવ્યું હતું કે “અમે જાણીએ છીએ કે યહૂદી સમુદાયમાં ચિંતા હજુ પણ વધુ છે. મને આશા છે કે આ ધરપકડો દર્શાવે છે કે અમે જવાબદારોને ન્યાય અપાવવા માટે અમારાથી બનતું બધું કરી રહ્યા છીએ.”
