આઈપીએલ 2026માં સોમવારે સનરાઈઝર્સ હૈદરાબાદના બે નવોદિત ફાસ્ટ બોલર્સે તેમની આઈપીએલની ડેબ્યુ મેચમાં રાજસ્થાન રોયલ્સને વેધક, ઘાતક ફાસ્ટ બોલિંગના ભૂકંપથી હચમચાવી નાખ્યું હતું. રાજસ્થાનની ઈનિંગ્સની પહેલી ઓવર નવોદિત પ્રફૂલ હિંગેએ નાખી હતી.
તેણે અત્યારસુધી અજેય રહેલી હરીફ ટીમની છાવણીમાં આ પહેલી ઓવરમાં જ સન્નાટો ફેલાવી દીધો હતો. વૈભવ સૂર્યવંશી, ધ્રુવ જુરેલ અને એલ. પ્રિટોરિયસ – ત્રણે આક્રમક બેટર્સને શૂન્ય રને વિદાય કરી દીધા હતા, ત્યારે હરીફ ટીમનો સ્કોર ફક્ત એક રનમાં ત્રણ વિકેટનો હતો.
એ પછી પોતાની બીજી અને ઈનિંગની ત્રીજી ઓવરમાં તેણે રાજસ્થાનના સુકાની રીયાન પરાગને પણ ફક્ત ચાર રને વિદાય કરી દેતાં રાજસ્થાનનો સ્કોર ફક્ત 9 રનમાં પાંચ વિકેટે કોઈ ક્લબની ટીમ જેવો દેખાતો હતો. હિંગેએ એકંદરે પોતાની ચાર ઓવરમાં 34 રન આપી ચાર વિકેટ ઝડપી હતી.
આઈપીએલના ઈતિહાસમાં કોઈપણ બોલરે ઈનિંગની પહેલી ઓવરમાં અત્યારસુધી ત્રણ વિકેટ ખેરવી નહોતી, તે ઐતિહાસિક સિદ્ધિ વિદર્ભના પ્રફૂલ હિંગેએ પોતાની ડેબ્યુ મેચમાં નોંધાવી હતી.
આ એક કાતિલ ઓવર ઓછી હોય તેમ બીજા છેડેથી પણ હૈદરાબાદે એક નવોદિત ફાસ્ટ બોલર, બિહારના સાકિબ હુસૈનને આક્રમણ સોપ્યું હતું. સાકિબે પણ પોતાની પહેલી જ ઓવરમાં યશસ્વી જયસ્વાલ જેવા સિદ્ધહસ્ત ડાબોડી બેટરને ફક્ત એક રનમાં વિદાય કરી દેતાં રાજસ્થાનના ડગાઉટ અને ડ્રેસિંગરૂમમાં સોપો પડી ગયો હતો.
સાકિબને જો કે, પછી વધુ સફળતા તેના બીજા સ્પેલમાં, 15મી ઓવરમાં મળી હતી. સાકિબે આઈપીએલમાં એકંદરે શ્રેષ્ઠ ડેબ્યુનો રેકોર્ડ ચાર ઓવરમાં ફક્ત 24 રન આપી ચાર વિકેટ સાથે પોતાના નામે નોંધાવ્યો હતો.
