જાણીતા ગાયક મિકા સિંહે પોતાની જીવનસાથીને પસંદ કરવા માટે એક સ્વયંવર રચ્યો હતો અને તે સ્ટાર ભારત ચેનલ પર દર્શાવવામાં આવ્યો હતો. આ શો દ્વારા અનેક યુવતીઓ મિકાને પોતાનો જીવનસાથી બનાવવા પહોંચી હતી. જોકે બાજી તો કોઈ બીજું જ મારી ગયું છે. એ બીજું કોઈ નહીં, પરંતુ મિકાની જ બેસ્ટ ફ્રેન્ડ આકાંક્ષા પુરી છે.
આકાંક્ષાની સાથે પ્રંતિકા દાસ અને નીત મહલ ફાઇનલ રાઉન્ડમાં હતી. મિકાએ આ ત્રણમાંથી આકાંક્ષાને જીવનસાથી તરીકે પસંદ કરી છે. આ બન્ને એક દાયકા કરતાં પણ વધુ સમયથી એકબીજાને ઓળખે છે. મિકાના ઘરે જ્યારે પૂજા રાખવામાં આવી હતી
એ વખતે પણ આકાંક્ષા તેની સાથે તેના ઘરમાં હાજર હતી. અગાઉ તે કહી ચૂકી હતી કે તે ‘સ્વયંવર: મિકા દી વોટી’માં ભાગ લેશે, કારણ કે તે મિકાને અન્ય કોઈ મહિલાની નજીક નથી જોઈ શકતી. આ શોની શરૂઆત થઈ એના ઘણા સમય બાદ તે વાઇલ્ડ કાર્ડ દ્વારા શોમાં એન્ટર થઈ હતી. બીજી તરફ મિકા સિંહે જણાવ્યું હતું કે તે ચાહે છે કે તેની મિત્ર તેની પત્ની બને. જોકે બન્નેનાં લગ્ન ક્યારે અને ક્યાં થશે એની માહિતી મળી નથી.
