બોલિવૂડ એક્ટ્રેસ કૃતિકા કામરા અને ફેમસ હોસ્ટ ગૌરવ કપૂરે મુંબઈમાં એક ખાનગી સમારંભમાં 11 માર્ચે લગ્ન કર્યા હતાં. આ સેલિબ્રિટી દંપતીએ કોઈ ભવ્ય અને પરંપરાગત લગ્નના બદલે ઘરે જ લગ્ન કરવાનો નિર્ણય કર્યો હતો અને તેમાં માત્ર પરિવારના સભ્યો અને કેટલાંક નજીકના મિત્રોને આમંત્રણ અપાયું હતું.
લગ્નના અવસર પર કૃતિકા કામરા લાલ રંગની ચંદેરી સાડીમાં ખૂબ જ સુંદર દેખાતી હતી. આ સાડી તેને તેની માતાએ ભેટમાં આપી હતી. લગ્ન બાદ ઘરના ટેરેસ પર એક આફ્ટર-પાર્ટીનું આયોજન કરાયું હતું. તેમાં ક્રિકેટર વીરેન્દ્ર સેહવાગ, ઝહીર ખાન અને યુવરાજ સિંહ હાજર રહ્યાં હતાં. નેહા ધૂપિયા, અંગદ બેદી, સોહા અલી ખાન, મલાઈકા અરોરા અને પૂજા ગૌર જેવા બોલિવૂડ અને ટીવી સ્ટાર્સ પણ સામેલ થયાં હતાં.
ગૌરવ અને કૃતિકાએ જણાવ્યું હતું કે ‘અમે હંમેશાથી માનતા આવ્યા છીએ કે જીવનની સૌથી ખાસ ક્ષણો એ છે જે તમે તમારા પ્રિયજનો સાથે શેર કરો છો. અમને ખૂબ આનંદ છે કે અમે અમારા પરિવાર અને નજીકના મિત્રો વચ્ચે મુંબઈમાં અમારા જીવનના આ નવા અધ્યાયની શરૂઆત કરી શક્યા છીએ.’
કૃતિકા કામરા અને ગૌરવ કપૂરે ગયા વર્ષના અંતમાં તેમના સંબંધોનો ખુલાસો કર્યો હતો. ત્યારથ તેમના લગ્ન વિશે ઘણી ચર્ચા ચાલી રહી હતી. જોકે તેઓએ તેના વિશે જાહેરમાં વાત કરી ન હતી, પરંતુ તેઓએ લગ્ન કરીને તેમના ફેન્સને સરપ્રાઈઝ કર્યા છે.
