અમદાવાદમાં કોરોના વાયરસના કેસમાં ફરી વધારો જોવા મળ્યો હતો. શુક્રવારે છેલ્લા 24 કલાકમાં પાંચ નવા કેસ નોંધાયા છે, જેમાં 84 વર્ષના વૃદ્ધ અને 20 વર્ષની યુવતી હોસ્પિટલમાં સારવાર હેઠળ છે, જ્યારે અન્ય દર્દીઓ હોમ આઇસોલેશનમાં છે. મે 2025માં અમદાવાદમાં કુલ 38 કેસ નોંધાયા છે, જેમાંથી 31 દર્દી હજુ સારવાર હેઠળ છે. ગુજરાતમાં વર્તમાન કુલ કેસમાં 80 ટકા તો અમદાવાદથી નોંધાયા છે, જે વિકટ સ્થિતિનો સંકેત આપે છે. 20 વર્ષની યુવતીને શ્વાસની તકલીફને કારણે સોલા સિવિલ હોસ્પિટલમાં ઓક્સિજન પર રાખવામાં આવી છે, પરંતુ તેની હાલત સ્થિર હોવાનું કહેવાય છે. આરોગ્ય તંત્ર કહે છે કે સ્થિતિ નિયંત્રણ હેઠળ છે, પરંતુ શરદી-ખાંસીના દર્દીઓ પર ખાસ નજર રાખવામાં આવી રહી છે. લોકોએ ગભરાવાની નહીં, પરંતુ સાવચેતી રાખવાની જરૂર છે.
આ સ્થિતિને ધ્યાનમાં રાખીને અમદાવાદની સરકારી હોસ્પિટલોમાં તૈયારીઓ શરૂ કરાઈ છે. સિવિલ હોસ્પિટલમાં 1200 બેડનો આઇસોલેશન વોર્ડ, SVP અને શારદાબેન હોસ્પિટલમાં પણ ખાસ વોર્ડ તૈયાર કરાયા છે. ઓક્સિજનની જરૂરિયાત માટે 20,000 લીટરની બે ટેન્ક તૈયાર છે. દરેક દર્દીના નમૂના ગાંધીનગરના GBRC ખાતે વેરિઅન્ટ ચકાસણી માટે મોકલવામાં આવે છે. રાજકોટમાં 43 વર્ષનો એક પુરુષ અને મહેસાણાના કડીમાં પશુપાલન વ્યવસાય સાથે સંકળાયેલો યુવક કોવિડ પોઝિટિવ જણાયો, જે હોમ આઇસોલેશનમાં છે. સરકારના આરોગ્ય વિભાગે લોકોને સાવચેતી રાખવા અપીલ કરી છે. ખાંસી કે શ્વાસની તકલીફ હોય તો તાત્કાલિક ડોક્ટરનો સંપર્ક કરવા અને ભીડવાળા સ્થળોએ માસ્ક પહેરવાની સલાહ આપવામાં આવી છે.
