ભારતની લોકપ્રિય ક્રિકેટ ટુર્નામેન્ટ આઈપીએલની બે ટીમો નવા માલિકોએ ખરીદી લીધાના અહેવાલો મંગળવારે મળ્યા હતા. રાજસ્થાન રોયલ્સનો 100 ટકા હિસ્સો ભારતીય અમેરિકન ઉદ્યોગ સાહસિક કાલ સોમાણીની આગેવાની હેઠળના એક કન્સોર્ટિયમે ખરીદી લીધો છે. એજ્યુકેશન ટેકનોલોજી, ડેટા પ્રાઈવસી, એઆઈ ગવર્નન્સ અને સ્પોર્ટ્સ-ટેક ક્ષેત્રના અગ્રણી સોમાણી ઈન્ટ્રાએજ, ટ્રુયો, ટ્રુયો.એઆઈ અને એકેડેમિયન જેવી વૈશ્વિક કંપનીઓના સ્થાપક છે.
તો રોયલ ચેલેન્જર્સ બેંગલોરનો 100 ટકા હિસ્સો ભારતના અગ્રણી મીડિયા હાઉસ ટાઈમ્સ ઓફ ઈન્ડિયા, આદિત્ય બિરલા ગ્રુપ, બ્લેકસ્ટોન ગ્રુપ અને બોલ્ટ વેન્ચર્સ કોન્સોર્ટિયમે ખરીદી લીધો હતો. સોમાણી રાજસ્થાન રોયલ્સમાં થોડો હિસ્સો તો કેટલાક સમયથી ધરાવતા જ હતા, હવે તેમના ગ્રુપે 100 ટકા હિસ્સો હસ્તગત કર્યો છે.
સોમાણીના આ સોદામાં અમેરિકન બિઝનેસમેન અને વોલમાર્ટ પરિવારના રોબ વોલ્ટન તેમજ હેમ્પ પરિવારનો પણ મૂડીરોકાણમાં હિસ્સો છે. હેમ્પ પરિવાર એનએફએલ (નેશનલ ફૂટબોલ લીગ) ની ‘ડેટ્રોઈટ લાયન્સ’ ટીમમાં બહુમતી હિસ્સો ધરાવે છે. આ કન્સોર્ટિયમમાં શીલા ફોર્ડ હેમ્પ પણ સામેલ છે, તેઓ ફોર્ડ મોટર કંપનીમાં મોટો હિસ્સો ધરાવતા ફોર્ડ પરિવારના સભ્ય છે. મળતી વિગતો મુજબ, આ કન્સોર્ટિયમે $૧.૬૩ અબજ (આશરે ૧.૨ અબજ પાઉન્ડ) ની બોલી લગાવી હતી.
૨૦૨૧માં સોમાણીએ રાજસ્થાન રોયલ્સમાં પ્રથમવાર રોકાણ કર્યું હતું ત્યારે તેમણે જણાવ્યું હતું કે, “અમે આ રોકાણમાં વિશાળ સંભાવનાઓ જોઈ રહ્યા છીએ અને આઈપીએલના ભવિષ્ય માટે ઉત્સાહિત છીએ.” રાજસ્થાન રોયલ્સના વર્તમાન માલિકો છેલ્લા છ મહિનાથી ટીમની ૧૦૦ ટકા હિસ્સેદારી વેચવા માટે મંત્રણા કરી રહ્યા હતા.
કાલ સોમાણી મુખ્યત્વે અમેરિકન ટેકનોલોજી ઇકોસિસ્ટમમાં ઊંડી પકડ ધરાવતા સીરીયલ એન્ટ્રપ્રનર (ઉદ્યોગ સાહસિક) તરીકે જાણીતા છે. સ્પોર્ટ્સ ક્ષેત્રે તેમનો પ્રવેશ સ્પોર્ટ્સ-ટેક પરના ધ્યાન સાથે શરૂ થયો હતો, જે ઝડપથી ટીમની માલિકીમાં પરિવર્તિત થયો છે. આઈપીએલ ઉપરાંત, સોમાણી ‘મોટર સિટી ગોલ્ફ ક્લબ’ના સહ-માલિક છે અને ટાઈગર વુડ્સ તથા રોરી મેકલરોય દ્વારા સ્થાપિત ‘TMRW સ્પોર્ટ્સ’ તેમજ ‘TGL ગોલ્ફ લીગ’માં પણ પ્રારંભિક રોકાણકાર રહી ચૂક્યા છે.
