બોલીવૂડની વિવાદાસ્પદ અભિનેત્રી અને ભાજપની સાંસદ કંગના રણૌત સિલ્વેસ્ટર સ્ટેલોન અને સ્કાર્લેટ રોઝ સ્ટલોન સાથે એક હોરર ફિલ્મથી હોલીવૂડમાં પદાર્પણ કરવા જઈ રહી છે. કંગનાની ફિલ્મ ‘બ્લેસ્ડ બી ધ એવિલ’માં ‘ટીન વુલ્ફ’ ફેમ ટાયલર પૌઝી પણ હશે. કંગનાની લાયન મૂવીઝની આ ફિલ્મનું દિગ્દર્શન ‘ન્યૂ મી’ અને ‘ટેઇલિંગ પોન્ડ’ના ડાયરેક્ટર અનુરાગ રદ્ર દ્વારા કરવામાં આવશે. ફિલ્મનું શૂટિંગ ન્યૂયોર્કમાં આ ઉનાળા દરમિયાન જ પૂર્ણ કરાશે, કારણ કે અમેરિકન પ્રેસિડેન્ટ ડોનાલ્ડ ટ્રમ્પે વિદેશી ફિલ્મ પ્રોડક્શન પર 100 ટકા ટેરિફની જાહેરાત કરી હોવાથી નિર્માતા તે બાબતે ચિંતિત છે. આ ફિલ્મ એક એવા દંપતીની છે, જે એક રહસ્યમય ફાર્મ ખરીદે છે, જેનો ભૂતકાળ ડરામણો હોય છે, જ્યાં એક ભયાનક ઘટના બની હોય છે. ફિલ્મમાં એક ગ્રામ્ય વિસ્તારની કહાની છે, જે અગોચર અસ્તિત્વની વાત કરે છે. આ અંગે રુદ્રએ એક ઇન્ટરવ્યૂમાં જણાવ્યું, કે તેને સ્થાનિક વાર્તાઓમાં બહુ જ રસ પડે છે કારણ કે તે અદ્દભુત હોય છે. દ્રએ જણાવ્યું, “મેં ભારતના ગામમાં જન્મીને ત્યાં જ મારું બાળપણ વિતાવ્યું છે. ત્યાં મેં એવી વાર્તાઓ સાંભળી છે, જે મારા મન અને હ્રદયમાં વણાઈ ગઈ છે. આ લોક કથા એટલી ખાસ હતી કે હું આ વાર્તાઓમાં ઘણો વિશ્વાસ ધરાવું છું. તેને સિનેમાના માધ્યમથી દુનિયાના ઓડિયન્સને બતાવવી હતી. કારણ કે આ સપનાઓને હકીકત સાથે જોડવાનો સૌથી સુંદર અને મજબૂત વિકલ્પ છે.” આ ફિલ્મનો કાન ફિલ્મ ફેસ્ટિવલમાં પ્રચાર-પ્રસાર કરવામાં આવ્યો હતો. જોકે, હજુ કંગનાના રોલ વિશે કોઈ ખાસ માહિતી બહાર આવી નથી. ફિલ્મની પટકથા રુદ્ર અને ગાથા તિવારીએ લખી છે અને તેઓ ફિલ્મના નિર્માતા પણ છે.
