ચીનના નિંગબોમાં ગયા સપ્તાહે પુરી થયેલી બેડમિંટન એશિયા ચેમ્પિયનશિપની ફાઈનલમાં રવિવારે ભારતના યુવા, નવા ઉભરતા શટલર આયુષ શેટ્ટીએ આશાસ્પદ દેખાવ સાથે રનર-અપ રહી રજત ચંદ્રક હાંસલ કર્યો હતો. 20 વર્ષના આયુષનો ફાઈનલમાં ચીનના જ શી યુકી સામે મુકાબલો હતો, જેમાં તેના હરીફે 21-8, 21-10થી તેને હરાવી ગોલ્ડ મેડલ પ્રાપ્ત કર્યો હતો. આ જંગ 42 મિનિટ ચાલ્યો હતો.
રનર અપ રહીને પણ આયુષે ઇતિહાસ રેકોર્ડ કર્યો હતો. તે 59 વર્ષના આ ટુર્નામેન્ટના ઈતિહાસમાં સિંગલ્સની ફાઇનલમાં પહોંચનારો પ્રથમ ભારતીય અને ઇતિહાસમાં બીજો ભારતીય બન્યો હતો. આ પહેલાં દિનેશ ખન્નાએ 1965માં ગોલ્ડ મેડલ પ્રાપ્ત કર્યો હતો.
2018માં એચ.એસ. પ્રણોય ભારત માટે બ્રોન્ઝ મેડલ જીતી લાવ્યો હતો. આ ટુર્નામેન્ટમાં ભારતનો છેલ્લો મેડલ 2023માં આવ્યો હતો, ત્યારે સાત્વિક અને ચિરાગે પુરુષોની ડબલ્સનો ખિતાબ જીત્યો હતો.
ટુર્નામેન્ટમાં અન્ય સ્ટાર ભારતીય ખેલાડીઓનો દેખાવ નિરાશાજનક રહ્યો હતો. પીવી સિંધુ બીજા રાઉન્ડમાં બહાર થઈ ગઈ હતી, તો લક્ષ્ય સેન પહેલા રાઉન્ડમાં જ પરાજય સાથે ટુર્નામેન્ટમાંથી બહાર થઈ ગયો હતો.
વિશ્વમાં 25મો ક્રમાંક ધરાવતા આયુષ શેટ્ટીએ ટુર્નામેન્ટમાં સારો દેખાવ કર્યો હતો. તેણે ક્વાર્ટર ફાઇનલમાં વિશ્વના 4મા ક્રમાંકિત જોનાથન ક્રિસ્ટીને 23-21, 21-17થી હરાવ્યો હતો જ્યારે ચાઇનીઝ તાઇપેઈના ચિન યુ જેન અને ચીનના લી શી ફેંગ જેવા મજબૂત ખેલાડીઓને પણ હરાવ્યા. સેમિફાઇનલમાં, આયુષે વિશ્વના પ્રથમ ક્રમાંકિત કુનલાવુત
વિતિદસારનને 75 મિનિટ ચાલેલી મેચમાં 10-21, 21-19, 21-17થી હરાવ્યો હતો.
તેણે પહેલો સેટ ગુમાવવા છતાં બાણ હેઠળ શાનદાર પ્રદર્શન કરી ફાઇનલમાં જગ્યા બનાવી હતી. જોકે, ફાઇનલમાં હાર મળતાં સિલ્વર મેડલ મળ્યો હતો.
