ભારતીય ક્રિકેટ બોર્ડ (BCCI) અને અન્ય કેટલાક સભ્ય બોર્ડ દ્વારા એશિયન ક્રિકેટ કાઉન્સિલ (ACC)ની આગામી બેઠકનો બહિષ્કાર કરવાનો નિર્ણય લીધો છે. આ બેઠક 24 જુલાઈએ બાંગ્લાદેશની રાજધાની ઢાકામાં યોજાશે. પરંતુ ભારતીય બોર્ડ ઢાકામાં યોજાનારી આ બેઠકમાં ભાગ લેવા ઇચ્છતું નથી.
BCCIએ ACC અને પાકિસ્તાન ક્રિકેટ બોર્ડ (PCB)ના અધ્યક્ષ મોહસિન નકવીને આ વાતની ઔપચારિક જાણ કરી છે કે જો બેઠક ઢાકામાં થશે તો તેઓ તેમાં ભાગ લેશે નહીં. BCCIનો આ નિર્ણય ભારતમાં અને બાંગ્લાદેશ વચ્ચેના તણાવપૂર્ણ રાજકીય સંબંધોને ધ્યાનમાં રાખીને લેવાયો છે. ભારત સિવાય શ્રીલંકા, ઓમાન અને અફઘાનિસ્તાનના ક્રિકેટ બોર્ડ પણ આ બેઠકના સ્થળ મુદ્દે સમાન વિરોધમાં છે અને તેમણે ભારતને સમર્થન આપ્યું છે. જોકે ACCના અધ્યક્ષ મોહસિન નકવી ઢાકામાં બેઠક યોજવાની દલીલ પર અડગ રહ્યા છે. BCCIએ આ મામલે પોતાનું વલણ સ્પષ્ટ કરતાં કહ્યું છે કે તેઓ ઢાકામાં યોજાનારી બેઠકમાં ભાગ નહીં લે. સાથે જ, તેમણે વ્યક્તિગત રીતે પણ બેઠકનું સ્થાન બદલવા વિનંતી કરી છે, પરંતુ અત્યાર સુધી કોઈ સત્તાવાર પ્રતિસાદ મળ્યો નથી. ACCના બંધારણ મુજબ ઢાકામાં યોજાનારી બેઠકમાં મુખ્ય સભ્યોની ગેરહાજરીમાં લેવામાં આવતા કોઈ પણ નિર્ણયો અમાન્ય ગણાશે. આથી એશિયા કપની મેજબાની અંગે વિવાદ ઊભો થવાની શક્યતા વધી છે. સૂત્રો કહે છે કે ઢાકામાં બેઠક યોજવાની નકવીના આગ્રહને ભારત પર દબાણ બનાવવાનો પ્રયાસ તરીકે જોવામાં આવી રહ્યું છે. હાલમાં બેઠક આડે થોડા જ દિવસ બાકી છે અને ACC તરફથી સ્થળ બદલવા અંગે હજુ સુધી કોઈ સત્તાવાર જાહેરાત કરવામાં આવી નથી. નોંધનીય છે કે આ વર્ષે એશિયા કપ સપ્ટેમ્બર મહિનામાં યોજાવાનો છે.
