આમિર ખાન સ્ટારર રેસલિંગ ડ્રામા ‘દંગલ’માં યુવા બબીતા ફોગટની ભૂમિકા ભજવનાર અભિનેત્રી સુહાની ભટનાગરનું 16 ફેબ્રુઆરીએ દિલ્હીમાં માત્ર 19 વર્ષની ઉંમરે અવસાન થયું હતું. તેના પરિવારે જણાવ્યું હતું કે તે ડર્માટોમાયોસિટિસથી પીડિત હતી. આ એક દુર્લભ બિમારી છે, જેનાથી ત્વચા પર ફોલ્લીઓ અને સ્નાયુઓમાં નબળાઇ આવે છે.
19 વર્ષીય અભિનેત્રીને 7 ફેબ્રુઆરીના રોજ ઓલ ઈન્ડિયા ઈન્સ્ટિટ્યૂટ ઓફ મેડિકલ સાયન્સમાં દાખલ કરાઈ હતી અને મેડિકલ કોમ્પ્લીકેશન પછી 16 ફેબ્રુઆરીના રોજ તેનું મૃત્યુ થયું હતું. પરિવારે જણાવ્યું હતું કે બે મહિના પહેલા આ બિમારીના લક્ષણો દેખાયા હતાં અને માત્ર દસ દિવસ પહેલા જ રોગનું નિદાન થયું હતું. સુહાનીની માતા પૂજા ભટનાગરે જણાવ્યું હતું કે “લગભગ બે મહિના પહેલા તેના હાથ પર લાલ ડાઘ દેખાયા હતા. અમે અલગ-અલગ હૉસ્પિટલમાં ડૉક્ટરોની સલાહ લીધી હતી પરંતુ તેનું નિદાન થઈ શક્યું ન હતું.”
સુહાનીએ ‘દંગલ’માં આમિર ખાનની નાની દીકરી (જુનિયર બબીતા ફોગટ)ની ભૂમિકા ભજવી હતી.આમિર ખાનની ટીમે સોશિયલ મીડિયા પર લખ્યું હતું કે ‘સુહાનીના નિધનના સમાચારથી અમે ખૂબ જ દુખી છીએ. તેના વિના દંગલ અધૂરી હોત. સુહાની, તું હંમેશા અમારા દિલમાં સ્ટાર બનીને રહીશ’.
