વેમ્બલીના અલ્પર્ટન સ્થિત ઇલિંગ રોડ પર સોમવાર 9 માર્ચના રોજ રાત્રે 8.28 વાગ્યે છરા વડે કરાયેલા હુમલામાં ચાર પુરુષોને ઇજા કરવામાં આવી હતી અને હુમલાખોરો ફરાર થઇ ગયા હતા. ઘટનાસ્થળેથી મળી આવેલા બે ઘાયલ પુરુષોને હોસ્પિટલમાં લઈ જવાયા હતા. જ્યારે પછીથી વધુ બે પુરુષો હોસ્પિટલમાં દાખલ થયા હતા. જો કે ૧૯થી ૨૫ વર્ષની વયના ચારેય પુરુષોની ઇજાઓ જીવલેણ જણાઇ નહતી.
લંડનની એર એમ્બ્યુલન્સ, એમ્બ્યુલન્સ ક્રૂ અને ઇન્સીડન્ટ રિસ્પોન્સ ઓફિસર સહિત પોલીસ કાફલો ઘટનાસ્થળે ઘસી ગયો હતો. આ બનાવ તાજેતરમાં હિન્દુ – ભારતીયોના બિઝનેસીસ પર થયેલા હુમલા સાથે સંકળાયેલ છે કે તે અંગે કોઇ માહિતી મળી નથી.
ઇન્સ્પેક્ટર યુ ઝાંગે કહ્યું હતું કે “અમને વેમ્બલીમાં થયેલી હિંસક ઘટનાની જાણ છે જ્યાં ચાર પુરુષો પર હુમલો કરવામાં આવ્યો હતો. સદનસીબે, તેમને ગંભીર ઇજાઓ થઈ નથી. આ તબક્કે, કોઈ ધરપકડ કરવામાં આવી નથી, અને અમે સંપૂર્ણ સંજોગો સ્થાપિત કરવા માટે સખત મહેનત કરી રહ્યા છીએ. અમે આ ઘટનાના હેતુ અંગે ખુલ્લું મન રાખી માહિતી ધરાવતી કોઈપણ વ્યક્તિને આગળ આવવા માટે અપીલ કરીએ છીએ. અમારું ધ્યાન તમામ સમુદાયોનું રક્ષણ કરવાનું, પીડિતોને ટેકો આપવાનું અને આ તપાસ આગળ વધતી વખતે વિસ્તારને સુરક્ષિત રાખવાનું છે.”
પોલીસે વિસ્તારમાં વધારાનું પેટ્રોલિંગ શરૂ કર્યું છે અને જો કોઈ પાસે માહિતી હોય તો તેમને 9 માર્ચ CAD7320 ટાંકીને 101 ફપર કૉલ કરવા અથવા ક્રાઈમસ્ટોપર્સને 0800 555 111 ઉપર કૉલ કરવા અપીલ કરી છે.
