નોર્થ વેસ્ટ લંડનના કિંગ્સબરીમાં ગત તા. 22 ફેબ્રુઆરીના રોજ વાહન અકસ્માતનો ભોગ બનેલા કેતનકુમાર પટેલનું નવ દિવસની હોસ્પિટલ સારવાર બાદ મૃત્યુ થતા તેમના પત્ની, ૩ વર્ષની દીકરી અને પરિવારજનોની મદદ માટે ગો ફંડમી પર જાહેર કરવામાં આવેલી અપીલને જોરદાર પ્રતિસાદ સંપડ્યો છે અને અત્યાર સુધીમાં કુલ £54,000નું ફંડ અકત્ર કરાયું છે. કેતન પટેલને તેના મિત્રો અને સ્થાનિક સમુદાયના સભ્યોએ શ્રદ્ધાંજલિ આપી છે.
22 ફેબ્રુઆરીની મોડી સાંજે કિંગ્સબરીમાં પ્રિન્સેસ એવન્યુ, હનીપોટ લેન જંકશન નજીક મોપેડ અને અન્ય વાહન વચ્ચે અથડામણમાં કેતનકુમાર વસરામદાસ પટેલ ગંભીર રીતે ઘાયલ થયા હતા. ઇમરજન્સી સેવાઓને જાણ કરાતા બે એમ્બ્યુલન્સ ક્રૂ, ફાસ્ટ રિસ્પોન્સ કારમાં બે પેરામેડિક્સ, એક એડવાન્સ્ડ પેરામેડિક અને ઇન્સીડન્ટ રીસ્પોન્સ ઓફિસર ઘટનાસ્થળે ધસી ગયા હતા. પેરામેડિક્સે ઘાયલ કેતનકુમારને ઘટનાસ્થળે સારવાર આપી તેને મુખ્ય ટ્રોમા સેન્ટરમાં લઈ ગયા હતા. પરંતુ સઘન તબીબી સારવાર છતાં, નવ દિવસ પછી પટેલનું મોત નીપજ્યું હતું.
કેતન પટેલ, મૂળ ગુજરાતના મહેસાણા જીલ્લાના બહુચરાજીના વતની છે અને તેમની પત્ની સપના પટેલ અને ત્રણ વર્ષની પુત્રી સાથે લંડનમાં રહેતા હતા.
કેતન પટેલના પરિવારને ટેકો આપવા અને અંતિમ સંસ્કાર માટે તેમના મૃતદેહને ભારત પરત મોકલવામાં મદદ કરવા માટે અને સપનાબેન પટેલના લાભાર્થે મેસરિયા વિશાલકુમાર બિપિનચંદ્ર દ્વારા સુરક્ષિત ભંડોળ એકત્ર કરવા અપીલ કરવામાં આવી હતી. આપ પણ જો મદદ કરવા માંગતા હો તો આ લિંક https://gofund.me/e4dbea25b પર ક્લીક કરી મદદ કરી શકો છો.
અકસ્માતની તપાસ ચાલુ છે અને કોઈ ધરપકડ કરવામાં આવી નથી.
