જાણીતા અખબાર ધ ઈમ્સની ગુપ્ત તપાસમાં યુકે ઇમિગ્રેશન સિસ્ટમમાં વધતા કાળા બજારનો પર્દાફાશ કરવામાં આવ્યો છે, જ્યાં દેશમાં ઇમિગ્રેશન કરનારાઓ ગેરકાયદેસર રીતે દેશમાં રહેવા માટે નકલી સ્કીલ્ડ વર્કર્સની વર્ક પરમીટ દ્વારા નોકરીઓ માટે હજારો પાઉન્ડ ચૂકવી રહ્યા છે. લેભાગુ એજન્ટો વર્ક પરમીટ માટે £13,000થી £20,000 સુધીની ફી વસૂલે છે અને નોકરીઓ માટે નકલી સર્ટિફીકેટ્સ ઓફ સ્પોન્સરશિપ (CoS) વેચી રહ્યા છે.
ગુપ્ત ફિલ્માંકન દ્વારા જાણવા મળ્યું છે કે એજન્ટો ખુલ્લેઆમ સ્વીકારે છે કે આ વ્યવસ્થા “માત્ર પગારપત્રક” માટે છે, જેમાં કોઈ વાસ્તવિક કામ કરવાની જરૂર નથી. આ કૌભાંડમાં જે તે માઇગ્રન્ટ્સ કાગળ પર માત્ર મેનેજમેન્ટ, આઇટી, લોજિસ્ટિક્સ અથવા કેર વર્કર્સની ભૂમિકાઓમાં કામ કરતા દેખાય છે. પૈસાના બદલામાં બનાવટી સીવી, પેસ્લિપ અને ટેક્સ રેકોર્ડ તૈયાર કરી આપવામાં આવે છે. વાસ્તવમાં, ઘણા લોકો રોકડમાં કામ કરે છે અથવા બિલકુલ કામ કરતા નથી અને દર મહિને સ્પોન્સર્સને તેમનો “પગાર” ચૂકવવાની ફરજ પાડવામાં આવે છે.
ટાઇમ્સની તપાસમાં 250થી વધુ નકલી નોકરીની ઓફરો જણાઇ આવી હતી અને તેમાં હોમ ઓફિસનું લાઇસન્સ ધરાવતા ડઝનબંધ એજન્ટો અને કંપનીઓ સામેલ હતી. હોમ ઓફિસે કહ્યું હતું કે તે આ તારણોની તાત્કાલિક તપાસ કરી રહી છે, જ્યારે નિષ્ણાતોએ ચેતવણી આપી હતી કે નબળું અમલીકરણ સ્કીલ વર્કર વિઝા સિસ્ટમનો વ્યાપક દુરુપયોગ કરી રહ્યું છે.
