જી20 સમિટની દરમિયાન ભારત અને બ્રિટિશ વડાપ્રધાન વચ્ચે અલગથી દ્વિપક્ષીય બેઠક યોજાઇ હતી. ભારતના વડાપ્રધાન નરેન્દ્ર મોદી અને બ્રિટિશ વડાપ્રધાન ઋષિ સુનકે શનિવારે આ દરમિયાન વ્યવસાયિક સંબંધોને મજબૂત કરવા અને રોકાણને પ્રોત્સાહન આપવાના માર્ગો પર ચર્ચા કરી હતી. બંને નેતાઓએ સમિટના પ્રથમ સત્ર પછી આ બેઠક યોજી હતી. અગાઉ, સુનકે સ્થળ પર પહોંચ્યા પછી નમસ્કાર કરીને મોદીનું સ્વાગત કર્યું હતું. ઓક્ટોબર 2022માં યુકેના વડાપ્રધાન બન્યા બાદ સુનકની આ પ્રથમ ભારત મુલાકાત હતી.
બંને નેતાઓએ ભારત-યુકે વ્યાપક વ્યૂહાત્મક ભાગીદારી તેમજ રોડમેપ 2030 મુજબ દ્વિપક્ષીય સહયોગના વિવિધ ક્ષેત્રોમાં પ્રગતિની સંતોષ સાથે નોંધ લઇને, અર્થતંત્ર, સંરક્ષણ અને સુરક્ષા, ટેકનોલોજી, ગ્રીન ટેક્નોલોજી અને ક્લાઈમેટ ચેન્જ, આરોગ્ય અને ગતિશીલતા ક્ષેત્રોમાં મહત્વના અને પરસ્પર હિતના આંતરરાષ્ટ્રીય અને પ્રાદેશિક મુદ્દાઓ પર પણ વિચારોનું આદાન-પ્રદાન કર્યું હતું.
બંને નેતાઓએ મુક્ત વ્યાપાર કરારની વાટાઘાટોની પ્રગતિની પણ સમીક્ષા કરી અને આશા વ્યક્ત કરી કે બાકીના મુદ્દાઓને વહેલી તકે ઉકેલી શકાશે જેથી સંતુલિત, પરસ્પર લાભદાયી અને આગળ દેખાતા મુક્ત વેપાર કરાર ટૂંક સમયમાં પૂર્ણ થાય.
પ્રધાનમંત્રી મોદીએ વધુ વિગતવાર ચર્ચા માટે પીએમ સુનકને વહેલી, પરસ્પર અનુકૂળ તારીખે દ્વિપક્ષીય મુલાકાત માટે આમંત્રણ આપ્યું હતું. વડા પ્રધાન સુનકે આમંત્રણ સ્વીકાર્યું અને સફળ G20 સમિટ માટે પીએમ મોદીને અભિનંદન આપ્યા હતા.
વડાપ્રધાન મોદીએ બેઠક પછી સોશિયલ મીડિયા પ્લેટફોર્મ X પર તેમની પોસ્ટમાં કહ્યું, “દિલ્હીમાં જી-20 સમિટથી અલગ વડાપ્રધાન ઋષિ સુનકને મળવું ખૂબ જ સારું હતું. અમે વ્યાપારી સંબંધોને મજબૂત કરવા અને રોકાણને પ્રોત્સાહન આપવા બાબતે ચર્ચા કરી. તેમણે કહ્યું કે ભારત અને બ્રિટન સમૃદ્ધ અને ટકાઉ બાબતો માટે કામ કરવાનું ચાલુ રાખશે. વડાપ્રધાન મોદીએ જાપાની વડાપ્રધાન ફ્યુમિયો કિશિદા સાથે દ્વિપક્ષીય બેઠક પણ કરી હતી.
