બોલીવૂડના એક સમયના હાર્ટથ્રોબ રિતિક રોશન હવે પ્રોડ્યુસર તરીકે પોતાની કારકિર્દી શરૂ કરી રહ્યા છે. ઘણા વર્ષો સુધી પોતાની અભિનય-ડાન્સથી દર્શકોમાં પોતાની ચાહના ઊભી કરનાર રિતિક હવે પોતાના એચઆરએક્સ ફિલ્મ્સ બેનર હેઠળ સક્રિય રીતે પ્રોડ્યુસર તરીકે કામ કરવાનું શરૂ કરશે. કહેવાય છે કે તેનું પ્રોડક્શન હાઉસ એમેઝોન પ્રાઇમ વીડિયો માટે એક મોટા બજેટની વેબ સિરીઝ બનાવી રહ્યું છે. 2019માં રિતિકે સુપર 30માં સાયલન્ટ પ્રોડ્યુસર તરીકે કામ કર્યું છે, ત્યારે હવે મોટા પ્રોજેક્ટમાં તે પ્રથમવાર પ્રોડ્યુસર તરીકે સક્રિયપણે પોતાની સફર શરૂ કરશે. રિતિક છેલ્લા ત્રણ વર્ષથી એક કોન્સેપ્ટ પર કામ કરે છે અને તે પોતે આ શોનું પ્રોડક્શન અને તેની પ્રક્રિયા પર નજર રાખશે. જોકે, હજુ આ સિરીઝના કાસ્ટિંગ, સ્ટોરી અંગે કોઇ વાત જાહેર કરવામાં આવી નથી. પરંતુ એવી ચર્ચા છે કે આ એક સોશિયલ થ્રિલર સિરીઝ હશે. આ સિરીઝનું શૂટિંગ આ વર્ષના અંત સુધીમાં શરૂ થઈ જશે એવી અપેક્ષા છે.
રિતિક માટે પ્રોડક્શન હાઉસ શરૂ કરવું એટલે માત્ર કોઈ કન્ટેન્ટને આર્થિક સહકાર આપવા પૂરતું નથી, પરંતુ તે મૂળમાંથી કોઈ પ્રોજેક્ટ પર કામ કરવા ઇચ્છે છે. હવે એચઆરએક્સ ફિલ્મ્સ હેઠળ, તે એક એવું પ્લેટફોર્મ ઊભું કરવા ઇચ્છે છે કે, જેનાથી તેનું કારકિર્દી વિસ્તારવાની સાથે નવા જમાનાની સ્ટોરી ઓટીટીના દર્શકો સુધી લઇ જવા ઇચ્છે છે. રિતિકનું આવનારું વર્ષ કામથી વ્યસ્ત રહેશ, તે એકસાથે ઘણા પ્રોજેક્ટ કરી રહ્યો છે. એક તરફ તે 2026માં ક્રિશ 4ના ડિરેક્ટર તરીકે કામ આગળ વધારવાની તૈયારી કરી રહ્યો છે, જેણે તેને દેશનો પ્રથમ સુપરહીરો બનાવ્યો. આ રીતે રિતિક હવે દિગ્દર્શક અને નિર્માતા તરીકે પોતાની કારકિર્દી સાથે બોલીવૂડમાં એક અલગ સ્થાન બનાવવા ઇચ્છે છે, તે માત્ર અભિનેતા બની રહેવાને બદલે બહુપ્રતિભાશાળી સ્ટોરી ટેલર બનવા ઇચ્છે છે.
