મુંબઇમાં સત્તાધારી ભાજપના એક ટોચના નેતા અંગે સોશિયલ મીડિયા પોસ્ટ કરવા બદલ ફસાયેલા ભારતીય મૂળના બ્રિટિશ ડોક્ટર એક મહિના કરતાં વધુ સમયથી પરત આવી શક્યા નથી. સંગ્રામ પાટિલ નામના યુકેના નાગરિક NHS સાથે જોડાયેલા છે. તેઓ 19 જાન્યુઆરીએ મુંબઈથી લંડન પરત આવવાના હતા ત્યારે તેમની અટકાયત કરવામાં આવી હતી. તેમની સામે લૂકઆઉટ નોટિસ ઇસ્યુ થઇ હોવાથી તપાસના કારણે તેઓ દેશ છોડી શકતા નથી. ભાજપના નેતા વિશે ‘વાંધાજનક’ પોસ્ટ કરવા બદલ તેમની તપાસ કરવામાં આવી રહી છે. ડોય પાટિલ ફેસબુક અને યુટ્યુબ પર નોંધપાત્ર ફોલોઅર્સ ધરાવે છે અને તેમણે તેમની સામેની કાર્યવાહીને ‘ગેરકાયદે’ ગણાવી હતી.
તેમને યુકે પરત આવવાની મંજૂરી ક્યારે મળશે તે નક્કી નથી. તેમણે કોર્ટમાં તેમના વિરુદ્ધ નોંધાયેલ પોલીસ કેસ પાછો ખેંચવા અને તેમના પર મુકાયેલા મુસાફરીના પ્રતિબંધો દૂર કરવાની માગણી કરી છે. આ કેસની હવે પછી સુનાવણી 27 ફેબ્રુઆરીએ થશે. તેમણે જણાવ્યું હતું કે, ‘મારા બાળકો અને મારી નોકરી યુકેમાં છે. આંતરરાષ્ટ્રીય કાયદો અને ભારતીય કાયદો મને મુક્તપણે ફરવાનો અધિકાર આપે છે. મારી સ્વતંત્રતા પર પ્રતિબંધો મુક્યા છે. હું ઘરે જઈ શકતો નથી.’
