ટ્વીટરના સીઇઓ તરીકે પરાગ અગ્રવાલના નામની જાહેરાત સાથે તેઓ અમેરિકા સ્થિત વૈશ્વિક બહુરાષ્ટ્રીય કંપનીઓના ભારતીય મૂળના એક્ઝિક્યુટિવની વધતી જતી પાવર ક્લબમાં સામેલ થયા છે. હાલમાં વિશ્વની આશરે અડધો ડઝન ટેકનોલોજી કંપનીઓની કમાન ભારતીય મૂળના વ્યક્તિના હાથમાં છે.
ટ્વીટરના વિદાય લઈ રહેલા સીઇઓ ડોર્સીએ સોમવારે જાહેરાત કરી હતી કે 37 વર્ષના અગ્રવાલ કંપનીના નવા ચીફ એક્ઝિક્યુટિવ ઓફિસર બનશે. અગ્રવાલે આઇઆઇટી મુંબઇ અને સ્ટેનફોર્ડ યુનિવર્સિટીમાં અભ્યાસ કરેલો છે. જેક ડોર્સીએ 16 વર્ષ બાદ તેમને સ્થાપેલી કંપનીના સીઇઓ પદેથી રાજીનામું આપ્યું છે.
ન્યૂ યોર્ક ટાઇમ્સના એક અહેવાલ અનુસાર અગ્રવાલને 10 લાખ ડોલરનો વાર્ષિક પગાર મળશે. આ ઉપરાંત તેમને બોનસ, રેસ્ટ્રિક્ટેડ સ્ટોક યુનિટ અને પરફોર્મન્સ આધારિત સ્ટોક યુનિટ મળશે.
અગ્રવાલ હવે એવા ભારતીય મૂળના એક્ઝિક્યુટિવમાં સામેલ થયા છે કે જેઓ બહુરાષ્ટ્રીય કંપનીઓની કમાન સંભાળે છે.
ગયા વર્ષના જાન્યુઆરીમાં ભારતીય મૂળના ટેકનોલોજી એક્ઝિક્યુટિવ અરવિંદ ક્રિષ્ના વિશ્વકક્ષાની અનુગામી પ્રક્રિયા બાદ મહાકાય આઇટી કંપની આઇબીએમના ચીફ એક્ઝિક્યુટિવ ઓફિસર બન્યા છે. તેમને આ હોદ્દા માટે વર્જિનિયા રોમેટ્ટીનું સ્થાન લીધું હતું. રોમેટ્રીએ આઇબીએમના નવા યુગ માટે અરવિંદ ક્રિષ્નાને યોગ્ય સીઇઓ તથા ક્લાઉડ અને કોગ્નિટિવ યુગમાં કંપનીને દોરી જવા માટે સંપૂર્ણ સજ્જ ગણાવ્યા હતા.
ઓગસ્ટ 2015માં ગૂગલના નવા સીઇઓ તરીકે સુંદર પિચાઇના નામની જાહેરાત કરી હતી. ડિસેમ્બરમાં પિચાઇ ગૂગલની માલિક કંપની આલ્ફાબેટના સીઇઓ બન્યા હતા. સુંદર પિચાઇએ અગ્રવાલ અને બોર્ડના ચેરમેન બ્રેટ ટેલરને શુભેચ્છા પાઠવીને જણાવ્યું હતું કે ટ્વીટરના ભાવિ અંગે તેઓ ખૂબ જ ઉત્સાહિત છે.
ફેબ્રુઆરી 2014માં સત્યા નડેલા અગ્રણી ટેકનોલોજી કંપની માઇક્રોસોફ્ટના સીઇઓ બન્યા હતા. મલ્ટિનેશનલ કંપનીમાં એક સામાન્ય હોદ્દા પરથી સમગ્ર કંપનીના ટોચના સ્થાને પહોંચ્યા હોય તેવી ભારતીય મૂળના બીજા એક્ઝિક્યુટિવમાં માસ્ટરકાર્ડના સીઇઓ અજય બંગા, પેપ્સિકોના ભૂતપૂર્વ સીઇઓ ઇન્દ્રા નૂયી, એડોબીના સીઇઓ શાંતનુ નારાયણ પણ સમાવેશ થાય છે.
મુંબઈમાં જન્મેલા અગ્રવાલે સોમવારે ટ્વીટ કરીને જેક ડોર્સી અને સમગ્ર ટીમનો દ્રદયપૂર્વક આભાર માન્યો હતો. ન્યૂ યોર્ક ટાઇમ્સના અહેવાલ અનુસાર અગ્રવાલ ટ્વીટરના પીઢ એક્ઝિક્યુટિવ છે અને તેઓ જેક ડોર્સીનો સંપૂર્ણ વિશ્વાસ ધરાવે છે. તેઓ કંપનીના ઘણા વ્યૂહાત્મક પ્રોગ્રામમાં સામેલ હતા.
ઇન્ડિયન સીઇઓની પાવરક્લબ
કંપની સીઇઓ
આલ્ફાબેટ સુંદર પિચાઈ
માઇક્રોસોફ્ટ સત્યા નડેલા
આઇબીએમ અરવિંદ ક્રિષ્ના
ટ્વીટર પરાગ અગ્રવાલ
એડોબી શાંતનુ નારાયણ
સંજય મેહરોત્રા માઇક્રોન ટેકનોલોજી
માસ્ટરકાર્ડ અજય બંગા
