ભારતીય મૂળના ટેકનોલોજી એક્ઝિક્યુટિવ મંગલા કુપ્પાને યુએસ ડિપાર્ટમેન્ટ ઓફ લેબરના ચીફ ઇન્ફર્મેશન ઓફિસર (CIO) તરીકે નિયુક્ત કરાયા છે. તેઓ આ હોદ્દા પર ગયા વર્ષના ઓક્ટોબરથી કામચલાઉ ધોરણે કામગીરી કરતાં હતાં અને હવે તેમની ભૂમિકાને સત્તાવાર બનાવવામાં આવી છે.
કુપ્પા હાલમાં લેબર ડિપાર્ટમેન્ટમાં ચીફ આર્ટિફિશિયલ ઇન્ટેલિજન્સ ઓફિસર તરીકે પણ સેવા આપે છે. તેઓ એજન્સીમાં માહિતી ટેકનોલોજી વ્યૂહરચના, ડિજિટલ ટ્રાન્સફોર્મેશન અને AI અપનાવવા સહિતની બાબતોની દેખરેખ રાખશે. લિંક્ડઇન પરની એક પોસ્ટમાં કુપ્પાએ પોતાની નિમણૂકની પુષ્ટિ કરતા કહ્યું હતું કે તે “સેવા કરતા રહેવા અને ફરક લાવવાની તક માટે આભારી છે”.
25 વર્ષથી વધુનો અનુભવ ધરાવતા અનુભવી ટેકનોલોજી એક્ઝિક્યુટિવ કુપ્પાએ લેબર ડિપાર્ટમેન્ટના આધુનિકીકરણ એજન્ડાને આગળ વધારવામાં મુખ્ય ભૂમિકા ભજવી છે, જેમાં એન્ટરપ્રાઇઝ AI વ્યૂહરચનાનો વિકાસ, ડેટા પ્લેટફોર્મનું વિસ્તરણ અને સાયબર સુરક્ષા સિસ્ટમોને મજબૂત બનાવવાનો સમાવેશ થાય છે.
તેઓ 2010માં શ્રમ વિભાગમાં જોડાયા હતાં અને ત્યારથી ચીફ ટેકનોલોજી ઓફિસર અને બિઝનેસ એપ્લિકેશન સર્વિસીસના ડિરેક્ટર સહિત અનેક વરિષ્ઠ હોદ્દાઓ સંભાળ્યા છે. આ પહેલાં તેમમે બ્યુરો ઓફ લેબર સ્ટેટિસ્ટિક્સમાં એક દાયકાથી વધુ સમય સેવા આપી હતી.
