અમેરિકન હોટેલ્સ એન્ડ લોજિંગ એસોસિએશન (AHLA)ના જણાવ્યા અનુસાર, ન્યૂયોર્ક સિટીના નાણાકીય વર્ષ 2027ના પ્રસ્તાવિત બજેટને કારણે હોટલના ખર્ચમાં વધારો થઈ શકે છે અને રોજગારી સામે ખતરો પેદા થઈ શકે છે. રિયલ પ્રોપર્ટી ટેક્સમાં 9.5 ટકાનો વધારો હોટલની નાણાકીય સ્થિતિ પર વધુ ભાર મૂકી શકે છે, કારણ કે ઓપરેટિંગ ખર્ચ પહેલેથી જ વધી રહ્યો છે.
ન્યૂયોર્ક સિટી કાઉન્સિલની આર્થિક વિકાસ સમિતિ (Committee on Economic Development) સમક્ષ જુબાની આપતા, AHLA એ નીતિ નિર્ધારકોને વિનંતી કરી હતી કે તેઓ ટેક્સમાં વધારો અને નીતિ-આધારિત ખર્ચની હોટલ ઉદ્યોગ પર પડતી સંચિત અસરનો વિચાર કરે.
AHLA ના પ્રેસિડેન્ટ અને CEO રોઝન્ના માયેટ્ટાએ જણાવ્યું હતું કે, “હોટલો ન્યૂયોર્ક સિટીના અર્થતંત્રનો પાયો છે, જે લાખો નોકરીઓને ટેકો આપે છે અને મહત્વપૂર્ણ ટેક્સ આવક પેદા કરે છે. આ બધુ એવા સમયે થઈ રહ્યુ છે જ્યારે આંતરરાષ્ટ્રીય પ્રવાસની માંગ હજુ પણ સંપૂર્ણપણે પુનઃસ્થાપિત થઈ નથી, ત્યારે નીતિ નિર્ધારકોએ વધારાનો બોજ લાદવાનું ટાળવું જોઈએ જે ઉદ્યોગની રિકવરીને ધીમી કરી શકે છે.” તેમણે વધુમાં ઉમેર્યું કે, શહેરના વ્યાપક આર્થિક સ્વાસ્થ્ય માટે મજબૂત હોટલ ક્ષેત્ર અત્યંત મહત્વનું છે.
AHLA ના વાઇસ પ્રેસિડેન્ટ અને પોલિસી કાઉન્સેલ સારાહ બ્રાટકોએ જણાવ્યું હતું કે હોટલો ન્યૂયોર્ક સિટીમાં દર વર્ષે લાખો નોકરીઓને સમર્થન આપે છે અને અબજો ડોલરની ટેક્સ આવક પેદા કરે છે. તેમણે જુબાનીમાં કહ્યું, “શહેર જ્યારે તેની બજેટ પ્રાથમિકતાઓનું મૂલ્યાંકન કરી રહ્યું છે, ત્યારે નીતિ નિર્ધારકોએ એ વાતની ખાતરી કરવી જોઈએ કે નવી નીતિઓ ન્યૂયોર્કના સૌથી વિશ્વસનીય આર્થિક એન્જિનને નુકસાન ન પહોંચાડે.”
એસોસિએશનની જુબાનીમાં કોર્પોરેટ ટેક્સ માળખામાં ફેરફાર અને ‘પાસ-થ્રુ એન્ટિટી ટેક્સ’ અંગે પણ ચિંતા વ્યક્ત કરવામાં આવી હતી. આનાથી હોટલ માલિકો માટે ખર્ચ વધી શકે છે, ખાસ કરીને એવા વ્યવસાયો માટે જે ભાગીદારી (partnerships) અથવા ‘S કોર્પોરેશન’ તરીકે કામ કરે છે. ચેતવણી આપવામાં આવી હતી કે શહેરના રિયલ પ્રોપર્ટી ટેક્સમાં વધારો થવાથી હોટલના નાણાકીય તંત્ર પર વધુ દબાણ આવશે.
