ઇરાનના સર્વોચ્ચ નેતા અયાતુલ્લા ખામેનેની ખાતમા માટે અમેરિકા-ઇઝરાયલે સંયુક્ત કાર્યવાહીની યોજના ઘણા મહિના પહેલા જ તૈયાર કરી હતી. અમેરિકી પ્રેસિડન્ટ ટ્રમ્પે જણાવ્યું હતું કે ખામેની અમારી ગુપ્તચર અને અત્યંત આધુનિક ટ્રેકિંગ સિસ્ટમ્સમાંથી છટકી શક્યા નથી. ઇઝરાયલ સાથેના ગાઢ સંકલનને કારણે ખામેની કે તેમની સાથે માર્યા ગયેલા અન્ય નેતાઓ કંઈ કરી શક્યા ન હતાં.
અમેરિકાની ગુપ્તચર એજન્સી સીઆઈએ ઘણા મહિનાઓથી ખામેનેની ગતિવિધિઓ પર નજર રાખી રહી હતી. આ સમયમાં સીઆઈએએ ખામેનેની દિનચર્યાની પેટર્ન સમજી લીધી હતી. સીઆઈએને જાણવા મળ્યું હતું કે શનિવારની સવારે તેહરાનના મહત્વપૂર્ણ સંકુલમાં ઈરાનના ટોચના અધિકારીઓની બેઠક યોજાવાની છે અને તેમાં ખામેને પોતે હાજર રહેવાના હતાં.
આ ગુપ્તચર માહિતી સીઆઈએ ઈઝરાયેલને આપી હતી. મૂળ યોજના મુજબ અમેરિકા અને ઇઝરાયેલ રાતના અંધારામાં હુમલો કરવાના હતા, પરંતુ જેવી સીઆઈએને બેઠકની ‘સંપૂર્ણપણે સચોટ’ માહિતી મળી, બંને દેશોએ સમય બદલવાનો નિર્ણય કર્યો હતો. ઈરાનના પ્રેસિડન્ટની ઓફિસ , સર્વોચ્ચ નેતાની ઓફિસ અને રાષ્ટ્રીય સુરક્ષા પરિષદ, ત્રણેય એક જ સંકુલમાં છે. તેથી હુમલાનો સમય બદલીને શનિવાર સવારનો કરાયો હતો.
ઇઝરાયેલમાં સવારે લગભગ 6 વાગ્યે લડાયક વિમાનોએ પોતાના મથકો પરથી ઉડાન ભરી હતી. હુમલામાં વિમાનોની સંખ્યા પ્રમાણમાં ઓછી હતી, પરંતુ તેઓ લાંબા અંતરની અને અત્યંત સચોટ મિસાઇલોથી સજ્જ હતા. વિમાનોના ઉડાન ભર્યાના બરાબર બે કલાક ને પાંચ મિનિટ પછી, તેહરાનના સમય મુજબ સવારે લગભગ 9:40 વાગ્યે, મિસાઇલો તે અત્યંત સુરક્ષિત સરકારી સંકુલ પર ત્રાટકી હતી.
