ભારત – ઈંગ્લેન્ડનો ટી-20 વર્લ્ડ કપમાં ગુરૂવારે જંગ

ભારતીય ક્રિકેટ ટીમે રવિવારે કોલકાતાના ઈડન ગાર્ડન્સમાં સુપર 8 રાઉન્ડની છેલ્લી અને નિર્ણાયક ટક્કરમાં વેસ્ટ ઈન્ડિઝને પાંચ વિકેટે હરાવી સેમિફાઈનલમાં પોતાનું સ્થાન નિશ્ચિત કર્યું હતું. બન્ને ટીમો માટે આ મેચ નિર્ણાયક હતી. ભારતે આ વિજયની મંઝિલે પહોંચતા કેટલાક નવા રેકોર્ડ પણ નોંધાવ્યા હતા. જો કે, સૌથી મહત્ત્વનો ફાળો ઓપનર સંજુ સેમસને અણનમ 97 રનનો આપ્યો હતો, તો સુકાની સૂર્યકુમાર યાદવ, તિલક વર્મા અને હાર્દિક પંડ્યાએ પણ નાની છતાં મહત્ત્વની ઈનિંગ સાથે પ્રદાન કર્યા હતા.

હવે સેમિફાઈનલમાં ભારતનો મુકાબલો ઈંગ્લેન્ડ સામે ગુરૂવારે મુંબઈમાં થશે. અગાઉ, શનિવારે સુપર 8 ગ્રુપ 2ની મેચમાં પાકિસ્તાને શ્રીલંકાને પાંચ રને હરાવ્યા છતાં નેટ રનરેટના આધારે તે સેમિફાઈનલમાં પહોંચી શક્યું નહોતું. શ્રીલંકા તો પહેલેથી જ બહાર નિકળી ગયું હતું. તે મુજબ, સુપર 8 ગ્રુપ 2માંથી સાઉથ આફ્રિકા અને ન્યૂઝીલેન્ડ સેમિફાઈનલમાં પહોંચ્યા છે.

ભારતના સુકાની સૂર્યકુમાર યાદવે ટોસ જીતી પહેલા વેસ્ટ ઈન્ડિઝને બેટિંગમાં ઉતારવાનો નિર્ણય લીધો હતો. વેસ્ટ ઈન્ડિઝે ચાર વિકેટે 195 રન કર્યા હતા, જેમાં ઓપનર રોસ્ટન ચેઝના 40 રન સર્વોચ્ચ સ્કોર હતો, તો પોવેલે 19 બોલમાં 34 અણનમ અને જેસન હોલ્ડરે 22 બોલમાં અણનમ 37 કરી ટીમના પડકારજનક સ્કોરમાં મહત્ત્વનો ફાળો આપ્યો હતો. ભારત તરફથી જસપ્રીત બુમરાહે 36 રનમાં બે, વરૂણ ચક્રવર્તી અને હાર્દિક પંડ્યાએ 40 રન આપી એક-એક વિકેટ લીધી હતી.

જવાબમાં ભારતની ઈનિંગનો આરંભ નબળો રહ્યો હતો. અભિષેક શર્મા અને ઈશાન કિશન બન્ને 10-10 રન કરી વિદાય થયા હતા અને ભારતે 41 રનમાં બે વિકેટ ગુમાવી દીધી હતી. જો એ પછી સંજુ સેમસન સાથે સુકાની સૂર્યકુમારે થોડી બાજી સંભાળી હતી અને 99 રને ભારતે ત્રીજી વિકેટ ગુમાવી ત્યારે સૂર્યકુમાર પણ ફક્ત 18 રન કરી શક્યો હતો. તિલક વર્માએ 15 બોલમાં 27 રન અને હાર્દિક પંડ્યાએ 14 બોલમાં 17 કર્યા હતા. સંજુ સેમસને આ વર્લ્ડ કપમાં પોતાની સૌપ્રથમ અડધી સદી 26 બોલમાં 3 છગ્ગા અને ચાર ચોગ્ગા સાથે નોંધાવી હતી અને પછી પણ છેક સુધી ટકી રહી ટીમના વિજયના પાયાના શિલ્પી તરીકે ભૂમિકા ભજવી હતી. તેણે એંકદરે 50 બોલમાં ચાર છગ્ગા અને 12 ચોગ્ગા સાથે 97 રન કર્યા હતા.

વેસ્ટ ઈન્ડિઝે કુલ સાત બોલર અજમાવ્યા હતા અને ફક્ત બે બોલરે તેમનો ચાર ઓવરનો ક્વોયા પુરો કર્યો હતો. જેસન હોલ્ડર અને શામર જોસેફે બે-બે વિકેટ લીધી હતી.

ઝિમ્બાબ્વે સામે 72 રને વિજયઃ અગાઉ, સુપર 8ની પોતાની બીજી મેચમાં ભારતે ગયા સપ્તાહે ગુરૂવારે (26 ફેબ્રુઆરી) ઝિમ્બાબ્વેને 72 રનના જંગી માર્જીનથી હરાવ્યું હતું. ભારતે ચાર વિકેટે 256 રનનો જંગી સ્કોર ખડકી દીધો હતો, જેમાં અભિષેક શર્માએ 30 બોલમાં 55, હાર્દિક પંડ્યાએ 23 બોલમાં અણનમ 50 અને તિલક વર્માએ ફક્ત 16 બોલમાં અણનમ 44 કર્યા હતા. જવાબમાં ઝિમ્બાબ્વે 6 વિકેટે ફક્ત 184 રન સુધી પહોંચી શક્યું હતું. અર્શદીપે ચાર ઓવરમાં ફક્ત 24 રન આપી ત્રણ વિકેટ લીધી હતી. એ સાથે ઝિમ્બાબ્વે બહાર થઈ ગયું હતું. 256 રનનો સ્કોર ભારતનો ટી-20 વર્લ્ડ કપમાં સૌથી મોટા સ્કોરનો રેકોર્ડ છે. એ ઉપરાંત, 2026ના ટી-20 વર્લ્ડ કપમાં પણ 256 રન તમામ ટીમનો સર્વોચ્ચ સ્કોર છે.