અમેરિકાની અવકાશ એજન્સી નાસા પહેલી એપ્રિલે આર્ટેમિસ II મિશન હેઠળ ચાર અવકાશાત્રીઓને ચંદ્ર ફરતેની યાત્રા કરાવવા માટે સજ્જ બની છે. આ મિશન હેઠળ આશરે 50 વર્ષ પછી માનવીની ચંદ્રની ફરતે યાત્રા કરાવવાની નાસાની મહત્ત્વકાંક્ષી યોજના છે. નાસાના મિશન મેનેજરોએ સોમવારે 10 દિવસના આ મિશનને લીલીઝંડી આપી હતી.
આ મિશન હેઠળ 322 ફૂટ (98 ફૂટ)ના મહાકાય સ્પેસ લોન્ચ સિસ્ટમ (SLS) રોકેટ મારફત અવકાશયાત્રીઓના ઓરિઅન ક્રૂ કેપ્સ્યુલને લોન્ચ કરાશે. આ મિશન ફ્લોરિડામાં નાસાના કેનેડી સ્પેસ સેન્ટરથી લોન્ચ કરાશે. આ જ સ્થળેથી યુએસ એપોલો પ્રોગ્રામના ચંદ્ર પર જનારા અવકાશયાત્રીઓ અડધી સદી પહેલા ઉડાન ભરી હતી.
આર્ટેમિસ II મિશનના નાસાના અવકાશયાત્રીઓમાં ક્રિસ્ટીના કોચ, વિક્ટર ગ્લોવર, રીડ વાઈઝમેન અને કેનેડિયન અવકાશયાત્રી જેરેમી હેન્સનનો સમાવેશ થાય છે, જેઓ શુક્રવારે હ્યુસ્ટનથી ફ્લોરિડા પહોંચ્યા હતાં. ઉડાન પહેલા તેમને બે અઠવાડિયા માટે ક્વોરેન્ટાઇન રખાયા હતાં અને સપ્તાહના અંતે કેનેડી સ્પેસ સેન્ટરના બીચ હાઉસમાં તેમના પરિવારો સાથે સમય વિતાવ્યો હતો.
મિશન લોન્ચ ડિરેક્ટર ચાર્લી બ્લેકવેલ-થોમ્પસને સોમવારે પત્રકારોને જણાવ્યું હતું કે ચોક્કસપણે તમામ સંકેતો યોગ્ય છે, ગણતરી શરૂ થતાંની સાથે જ અમે શ્રેષ્ઠ સ્થિતિમાં છીએ. હવામાન સ્થિતિઓ સમયસર પ્રક્ષેપણ માટે અનુકૂળ છે. જો હવામાન વધુ ખરાબ થાય અને મુશ્કેલી ઉભી થાય તો નાસા 6 એપ્રિલ સુધી કોઈપણ દિવસે ફરીથી લોન્ચનો પ્રયાસ કરશે. આ પછીની નવી તક માટે 30 એપ્રિલ સુધી રાહ જોવી પડશે.
આર્ટેમિસ II મિશન હેઠળ અવકાશયાત્રીઓ 10 દિવસ સુધી ચંદ્રની આસપાસની સફર કરશે અને પછી પરત આવશે. તેમની યાત્રા 252,000 માઇલ (406,000 કિમી) દૂરની હશે, જે માનવજાતની અત્યાર સુધીની સૌથી દૂરની મુસાફરી હશે.
અગાઉ 1970માં એપોલો-13ના ચંદ્ર મિશનમાં ત્રણ અવકાશયાત્રીઓ આશરે 248,000 માઇલની સૌથી દૂર અવકાશ ઉડાન કરી હતી. આ મિશન ઓક્સિજન ટાંકીમાં વિસ્ફોટ પછી તકનીકી સમસ્યાઓથી ઘેરાયેલું હતું અને યોજના મુજબ ચંદ્ર પર ઉતરાણ કરી શક્યુ ન હતું.
નાસાનું પહેલું સમાનવ અવકાશયાન એપોલો -11 (20, જુલાઇ, 1969) હતું. એપોલો- 11 અવકાશયાનમાં નાસાના નીલ આર્મસ્ટ્રોંગ, બઝ એલ્ડ્રીન, માઇકલ કોલીન્સ હતાં. નીલ આર્મસ્ટ્રોંગ અને બઝ એલ્ડ્રીન ચંદ્રની ધરતી પર ઉતર્યા હતાં, જ્યારે માઇકલ કોલીન્સ ચંદ્રની ધરતીથી ઉપર ફરતાં ઓર્બિટરમાં હતાં. નીલ આર્મસ્ટ્રોંગ અને બઝ એલ્ડ્રીન તેમની સાથે ચંદ્રના ખડકો લાવ્યા હતાં, જેનું વિશ્વના ખગોળશાસ્ત્રીઓએ સંશોધન કર્યું હતું.
