નોર્થ વેસ્ટ લંડનના કિંગ્સબરી સ્ટેશનની બહાર કિંગ્સબરી રોડ પર પાન-મસાલા ખાઇને થૂંકવા બદલ બ્રેન્ટ કાઉન્સિલે અક્ષિતકમાર પટેલને £1,391નો દંડ અને નોર્થ વેમ્બલી સ્ટેશન નજીક ક્લેરેન્ડન ગાર્ડન્સ ખાતે પાન-મસાલા ખાઇને થૂંકવા બદલ હિતેશ પટેલને પણ £1,391નો દંડ ફટકારવામાં આવ્યો હતો.
બંને જણાને શરૂઆતમાં £100 દંડ ફટકારવામાં આવ્યો હતો. જો કે, દંડની ચૂકવણી કરવામાં નિષ્ફળ ગયા પછી, કેસ કોર્ટમાં લઈ જવામાં આવ્યા હતા અને કોર્ટે તેમને નોંધપાત્ર રીતે વધુ દંડ ફટકાર્યો હતો.
કાઉન્સિલના એન્ફોર્સમેન્ટ માટેના કેબિનેટ સભ્ય, કાઉન્સિલર કૃપા શેઠે કહ્યું “અમે આપણી શેરીઓ બગાડનારાઓ પ્રત્યે ઝીરો ટોલરન્સનો અભિગમ ચાલુ રાખીએ છીએ. અમે જે પણ દંડ ફટકારીએ છીએ તે ગુનેગારો માટે સ્પષ્ટ ચેતવણી સમાન છે કે જો તમે અમારી શેરીઓમાં ગંદકી કરશો, તો અમે તમને શોધીશું અને તમે દંડ ચૂકવશો. મને આનંદ છે કે અમે ગયા વર્ષે ફટકારેલા દંડની રકમ હવે બમણી કરી છે.’’
