ઇન્ડિયન પ્રીમિયર લીગ (આઇપીએલ) 2026ની સોમવારે ગુવાહાટીના બરસાપારા ક્રિકેટ સ્ટેડિયમમાં રમાયેલી મેચમાં રાજસ્થાન રોયલ્સે ચેન્નાઈ સુપર કિંગ્સને 8 વિકેટે પરાજ્ય આપ્યો હતો. મેચમાં પ્રથમ બેટિંગ કરવા ઉતરેલી ચેન્નાઈ સુપર કિંગ્સની ટીમ 20 ઓવરમાં 127 રન પર ઓલઆઉટ થઈ ગઈ હતી. રાજસ્થાને 47 બોલ બાકી હતાં ત્યારે જ આ ટાર્ગેટ હાંસલ કર્યો હતો.
વૈભવ સુર્યવંશીએ માત્ર 17 બોલમાં 4 ચોગ્ગા અને 5 છગ્ગાની મદદથી 52 રન ફટકાર્યા હતા. આ દરમિયાન વૈભવે 15 બોલમાં પોતાની ફિફ્ટી પૂરી કરી હતી, જે આઈપીએલ ઈતિહાસની સંયુક્ત રીતે ત્રીજી સૌથી ઝડપી ફિફ્ટી છે. રાજસ્થાન તરફથી જોફ્રા આર્ચર, નાન્દ્રે બર્ગર અને રવિન્દ્ર જાડેજાએ 2-2 વિકેટ ઝડપી હતી.
અગાઉ પ્રથમ બેટિંગ કરવા આવેલી ચેન્નાઈ સુપર કિંગ્સના તમામ બેટ્સમેનો ફ્લોપ સાબિત થયા હતા, જેમાં સંજુ સેમસન, સરફરાઝ ખાન, રુતુરાજ ગાયકવાડ અને શિવમ દુબે જેવા સ્ટાર ખેલાડીઓ સામેલ હતા. જેમી ઓવરટને ટીમની લાજ રાખી હતી ટીમ તરફથી સૌથી મોટી ઈનિંગ રમતા 36 બોલમાં 43 રન બનાવ્યા હતા. બેટિંગ કરવા ઉતરેલા 11 બેટ્સમેનોમાંથી 8 તો બે આંકડાનો સ્કોર પણ કરી શક્યા ન હતા. બીજી તરફ રાજસ્થાન માટે જોફ્રા આર્ચર, નાન્દ્રે બર્ગર અને રવિન્દ્ર જાડેજાએ 2-2 વિકેટ મેળવી હતી. આ ઉપરાંત બ્રિજેશ શર્મા, સંદીપ શર્મા અને રવિ બિશ્નોઈએ 1-1 વિકેટ ઝડપી હતી.
