રેપરમાંથી રાજકારણી બનેલા બાલેન્દ્ર શાહ ‘બાલેન’ શુક્રવાર, 27 માર્ચે નેપાળના 47 વડાપ્રધાન બન્યાં હતાં. રાષ્ટ્રને હચમચાવી નાખનારા જનરલ-ઝી વિરોધ પ્રદર્શનમાં કે પી શર્મા ઓલીની આગેવાની હેઠળનીની સરકારને ઉથલાવી નાંખ્યાના છ મહિના પછી નેપાળને સૌથી યુવા વડાપ્રધાન મળ્યાં છે.
રાષ્ટ્રીય સ્વતંત્ર પાર્ટી (RSP)ના 35 વર્ષીય નેતાએ બપોરે ૧૨.૩૪ વાગ્યે શીતલ નિવાસ સ્થિત રાષ્ટ્રપતિ કાર્યાલયમાં એક સમારોહમાં શપથ ગ્રહણ કર્યા હતાં. બાલેન આ હિમાલયના રાષ્ટ્રમાં લોકશાહી રીતે ચૂંટાયેલા સૌથી યુવા વ્યક્તિ છે. બાલેનના શપથ ગ્રહણ સમારોહમાં હિન્દુ અને બૌદ્ધ ધાર્મિક પરંપરાઓનું અનોખું મિશ્રણ જોવા મળ્યું હતું. ધાર્મિક વિધિઓમાં સાત બ્રાહ્મણો દ્વારા શંખનાદ, ૧૦૮ હિન્દુ બટુકો અથવા યુવાન બ્રાહ્મણો દ્વારા વૈદિક સ્તોત્રો અને ૧૦૭ લામાઓ દ્વારા મંગલ વચન અથવા બૌદ્ધ ગ્રંથના પઠનનો સમાવેશ થતો હતો.
૫ માર્ચે યોજાયેલી સામાન્ય ચૂંટણીમાં, કાઠમંડુના ભૂતપૂર્વ મેયર બાલેને ઝાપા-૫ મતવિસ્તારમાં ચાર વખતના વડાપ્રધાન શર્મા ઓલીને મોટા માર્જિનથી હરાવ્યા હતાં. આ ચૂંટણીમાં RSPએ પ્રચંડ વિજય મેળવ્યો હતો. પ્રતિનિધિ ગૃહ (HoR)ની કુલ ૨૭૫ બેઠકોમાંથી ૧૮૨ બેઠકો જીતી હતી.
બાલેન શાહના વ્યક્તિત્વ અને તેમની કાર્યશૈલી પાછળ ભારતનો મોટો પ્રભાવ છે. તેમણે પોતાનું ઉચ્ચ શિક્ષણ ભારતમાં પૂર્ણ કર્યું છે. કાઠમાંડુમાં બેચલર ડિગ્રી મેળવ્યા બાદ, બાલેન શાહ ભારત આવ્યા હતા અને એન્જિનિયરિંગનો અભ્યાસ કર્યો હતો. વિશ્વેશ્વરૈયા ટેકનોલોજીકલ યુનિવર્સિટીમાં અભ્યાસ કર્યો હતો. તેમણે ભારતની પ્રતિષ્ઠિત વિશ્વેશ્વરૈયા ટેકનોલોજીકલ યુનિવર્સિટી (કર્ણાટક) માંથી સ્ટ્રક્ચરલ એન્જિનિયરિંગમાં માસ્ટર ડિગ્રી મેળવી છે. ભારતમાં મેળવેલી આ એન્જિનિયરિંગની ડિગ્રી અને ટેકનિકલ સમજને કારણે જ તેમણે કાઠમાંડુના મેયર તરીકે ઇન્ફ્રાસ્ટ્રક્ચર અને શહેરી વિકાસમાં ક્રાંતિકારી ફેરફારો કર્યા હતા. જેણે તેમને વડાપ્રધાન પદ સુધી પહોંચાડવામાં મદદ કરી છે.
