સલમાન ખાનની છેલ્લી ફિલ્મ ‘સિકંદર’ને દર્શકોએ વધારે સારો રીસ્પોન્સ ન આપ્યો હોવા છતાં પણ નિર્માતાઓ તેને સાઇન કરવા માટે આતુર હોય છે. 2020માં ગલવાન ઘાટીમાં ભારત-ચીન વચ્ચે થયેલા ઘર્ષણ આધારિત એક ફિલ્મ બનાવવાનું આયોજન થયું છે, જેમાં સલમાન ખાનને ભારતીય આર્મી ઓફિસરની ભૂમિકા ઓફર થઇ છે. ‘ઈન્ડિયાઝ મોસ્ટ ફીયરલેસ 3’ નામના પુસ્તક આધારિત ફિલ્મનું દિગ્દર્શન અપૂર્વ લાખિયા કરશે.
અપૂર્વ લાખિયાની જાણતી ફિલ્મોમાં ‘શૂટઆઉટ એટ લોખંડવાલા’નો સમાવેશ થાય છે, જે સત્યઘટના આધારિત ફિલ્મ હતી. અપૂર્વ લાખિયા લાંબા સમયથી ગલવાન ઘાટીમાં ભારત-ચીન ઘર્ષણ પર ફિલ્મ બનાવવા ઇચ્છતા હતા. આ ફિલ્મની કથા અને પાત્રો અંગે સલમાન તથા અપૂર્વ વચ્ચે ચર્ચા થઈ હતી. ‘ઈન્ડિયાઝ મોસ્ટ ફિયરલેસ 3’ નવલકથાનું નેરેશન સાંભળ્યા પછી સલમાન પણ અપૂર્વની ઓફર સ્વીકારવાનું વિચારે છે અને ટૂંક સમયમાં આ અંગે જાહેરાત થઈ શકે છે.
શિવ અરુર અને રાહુલ સિંહ લિખિત આ પુસ્તકમાં ભારતીય સૈનિકોની વીરતા દર્શાવવામાં આવી છે. પુસ્તકમાં ગલવાન ઘાટી સંબંધિત પ્રકરણ સલમાનને ખૂબ પસંદ આવ્યું છે. સલમાન ખાનના હાથ પર ઘણી ફિલ્મો છે, પરંતુ તેઓ આ ફિલ્મનું શૂટિંગ ઝડપથી શરૂ કરવા ઇચ્છે છે. સલમાન અને નિર્માકા દ્વારા આ ફિલ્મની જાહેરાત થયા પછી ત્રણ-ચાર મહિનામાં જ શૂટિંગ શરૂ કરવાનું આયોજન છે. સલમાન ખાન પાસે અન્ય ઘણી ફિલ્મો છે અને શાહરૂખની જેમ ધમાકેદાર કમબેક કરવા તે આતુર છે. સલમાન ખાન સાથે ‘સુલતાન’, ‘ટાઈગર ઝિંદા હૈ’ અને ‘ભારત’ બનાવનારા અલી અબ્બાસ ઝફર એક એક્શન એન્ટરટેઈનર ફિલ્મ બનાવવા ઇચ્છે છે. ‘બજરંગી ભાઈજાન’ના ડાયરેક્ટર કબીરખાન પણ સલમાન સાથે ફિલ્મ બનાવવા માગે છે. સૂરજ બરજાત્યાએ સલમાનને ફેમિલી ફિલ્મ ઓફર કરી છે.
