ચીનના તિયાનજિનમાં બે દિવસીય શાંઘાઈ કોઓપરેશન ઓર્ગેનાઈઝેશન (SCO) સમિટ દરમિયાન ચીનના પ્રેસિડન્ટ શી જિનપિંગ, રશિયાના પ્રેસિડન્ટ વ્લાદિમીર પુતિન અને ભારતના વડાપ્રધાન નરેન્દ્ર મોદી વચ્ચેની બેઠક પર વિશ્વભરની નજર રહેશે. અમેરિકાના પ્રેસિડન્ટ ડોનાલ્ડ ટ્રમ્પની ટેરિફ વચ્ચે વિશ્વના આ દિગ્ગજ નેતાઓ વચ્ચે બેઠક યોજાઈ રહી છે.
આ વર્ષે ચીનમાં યોજાઈ રહેલી SCO પ્લસ સમિટમાં 10 સભ્ય દેશો ઉપરાંત બીજા 10 દેશના નેતાઓ હાજરી આપી રહ્યાં છે. આ સમીટમાં રશિયન પ્રેસિડન્ટ વ્લાદિમીર પુતિન પણ ભાગ લેશે, તે 2001માં SCOની સ્થાપના પછી વિશ્વના સૌથી વધુ નેતાઓ આ સમીટમાં હાજરી આપી રહ્યાં છે. ચીન, ભારત અને રશિયા ઉપરાંત, આ જૂથમાં ઈરાન, કઝાકિસ્તાન, કિર્ગિસ્તાન, પાકિસ્તાન, તાજિકિસ્તાન, ઉઝબેકિસ્તાન અને બેલારુસનો સમાવેશ થાય છે.
સાત વર્ષમાં પીએમ મોદીની આ પહેલી ચીન મુલાકાત છે. જૂન 2020માં પૂર્વી લદ્દાખની ગલવાન ખીણમાં ભારતીય અને ચીની સૈનિકો વચ્ચે થયેલી ઘાતક અથડામણ બાદ ભારત અને ચીન વચ્ચેના સંબંધોમાં ખટાશ આવી ગઈ હતી.ઓક્ટોબર 2024માં કરાર હેઠળ ડેમચોક અને ડેપસાંગના છેલ્લા બે ઘર્ષણ બિંદુઓથીથી બંને દેશોએ એકબીજાના સૈનિકોને પાછા બોલાવી લીધા હતા અને તેનાથી સરહદ પરની તંગદિલીમાં ઘટાડો થયો હતો.
ચીનમાં પ્રેસિડન્ટ શી જિનપિંગ સાથેની તેમની મહત્વપૂર્ણ મુલાકાત પહેલા વડાપ્રધાન નરેન્દ્ર મોદીએ શુક્રવારે જણાવ્યું હતું કે વૈશ્વિક અર્થતંત્રમાં હાલની અસ્થિરતાને ધ્યાનમાં રાખીને વિશ્વ આર્થિક વ્યવસ્થામાં સ્થિરતા લાવવા માટે ભારત અને ચીન સાથે મળીને કામ કરે તે મહત્વપૂર્ણ છે. નવી દિલ્હી પરસ્પર આદર, સહિયારા હિતો અને સંવેદનશીલતા પર આધારિત વ્યૂહાત્મક, લાંબા ગાળાના અભિગમ દ્વારા બેઇજિંગ સાથે દ્વિપક્ષીય સંબંધોને મજબૂત બનાવવા માટે પ્રતિબદ્ધ છે. ઇન્ડો પેસિફિક રિજનમાં શાંતિ માટે ચીન સાથે સ્થિર સંબંધો જરૂરી છે. બહુ-ધ્રુવીય એશિયા અને બહુ-ધ્રુવીય વિશ્વ માટે પણ બંને દેશો વચ્ચેના સંબંધો મહત્વપૂર્ણ છે,
અમેરિકન પ્રેસિડનટ ડોનાલ્ડ ટ્રમ્પની ભારત પરની 50 ટકા ટેરિફ વચ્ચે એશિયા આ બે હરીફો દેશો વચ્ચે સુધારાના સંકેત મળી રહ્યાં છે ત્યારે મોદી 31 ઓગસ્ટે શાંઘાઈ કો-ઓપરેશન ઓર્ગેનાઈઝેશન (SCO) સમિટ દરમિયાન શી જિનપિંગ સાથે બેઠક કરશે. મોદી સાત વર્ષમાં પ્રથમ વખત SCO સમિટમાં ભાગ લેવા માટે ચીનની મુલાકાત જઈ રહ્યાં છે. SCOના સભ્યો દેશોમાં રશિયા અને ઈરાનનો પણ સમાવેશ થાય છે.
જાપાની વર્તમાનપત્ર ધ યોમિઉરી શિમ્બુનને આપેલા ઇન્ટરવ્યૂમાં મોદીએ જણાવ્યું હતું કે ગયા વર્ષે કાઝાનમાં પ્રેસિડન્ટ શી જિનપિંગ સાથેની મારી મુલાકાત પછી, દ્વિપક્ષીય સંબંધોમાં સ્થિરતા આવી છે અને તેમાં સકારાત્મક પ્રગતિ થઈ છે. ભારત અને ચીન વચ્ચે સ્થિર, અનુમાનિત અને મૈત્રીપૂર્ણ દ્વિપક્ષીય સંબંધો પ્રાદેશિક અને વૈશ્વિક શાંતિ અને સમૃદ્ધિ પર સકારાત્મક અસર કરી શકે છે.
