બોલિવૂડની ફેશન આઈકોન ગણાતી સોનમ કપૂરને લંડનમાં વડાપ્રધાન રિશિ સુનકે ખાસ આમંત્રણ આપ્યું છે. લંડનમાં વડાપ્રધાનના સત્તાવાર નિવાસ સ્થાન-10 ડાઉનિંગ સ્ટ્રીટ ખાતે તાજેતરમાં યુકે-ઈન્ડિયા વીકનું આયોજન કરાયું છે. ઈન્ડિયા ગ્લોબલ ફોરમ દ્વારા 26થી 30 જૂન દરમિયાન લંડન ખાતે વિવિધ કાર્યક્રમો યોજવામાં આવ્યા હતા. જેમાં 28મીએ વડાપ્રધાનના નિવાસ સ્થાને રિસેપ્શનનું આયોજન કરાયું હતું. વડાપ્રધાન સુનકના યજનમાન પદે રીસેપ્શન યોજાઈ રહ્યું હોવાથી સોનમ કપૂર પણ લંડન પહોંચી છે. સોનમે ભારતનું પ્રતિનિધિત્વ કર્યું છે. અગાઉ કિંગ ચાર્લ્સના રાજ્યાભિષેકમાં પણ સોનમ કપૂરને વિશેષ આમંત્રણ મળ્યું હતું. લંડનમાં સોનમ કપૂરનું ઘર પણ છે અને ઘણાં દિવસો ત્યાં રોકાતી હોય છે.
ઉલ્લેખનીય છે કે, ભારત અને ઈંગ્લેન્ડના સંબંધો મજબૂત બનાવવા અને બંને રાષ્ટ્રો વચ્ચે મહત્ત્વના મુદ્દા પર સહમતિ સધાય તે હેતુથી યુકે-ઈન્ડિયા વીકની આ પાંચમી સીઝન યોજાઈ હતી. સોશિયલ મીડિયા અને સોશિયલ ઈવેન્ટ્સ દરમિયાન ચર્ચામાં રહેતી સોનમ કપૂરે લાંબા સમય બાદ એક્ટિંગમાં કમબેકની તૈયારી કરી છે. સોનમ હવે ઓટીટીમાં ડેબ્યુ કરવાની છે. સોનમની પહેલી વેબ સિરીઝ બ્લાઈન્ડ 7 જુલાઈથી સ્ટ્રીમ થવાની છે. આ સિરીઝમાં પુરબ કોહલી, વિનય પાઠક અને લિલેટ દુબે પણ મહત્ત્વની ભૂમિકામાં છે.
