દેશના દરિયા કિનારાઓ પરથી દેશમાં ગેરકાયદેસર રીતે પ્રવેશતા લોકોની “બોટ રોકવા” માટે વડા પ્રધાન ઋષિ સુનકની પ્રતિજ્ઞાને નવુ બળ મળ્યું છે અને લાંબા સમયથી અટવાયેલા સંસદીય અવરોધને દૂર કર્યો છે. રાજા ચાર્લ્સ III તરફથી શાહી સંમતિ પછી ટૂંક સમયમાં ઇલીગલ માઇગ્રેશન બિલ કાયદો બનશે. આ વિધેયક હેઠળ, યુકેના હોમ સેક્રેટરીની કાનૂની ફરજ બની રહેશે કે તેઓ ગેરકાયદેસર રીતે યુકેમાં પ્રવેશતા કોઈપણને અટકાયતમાં રાખે અને તેનને દૂર કરે.
સોમવારે હાઉસ ઓફ લોર્ડ્સમાં મોડી રાતની ચર્ચામાં, બિલમાં વધુ સુધારાને બરતરફ કરવામાં આવ્યા હતા અને આ મુદ્દા પર બંને ગૃહો વચ્ચેના મડાગાંઠ પછી તે પસાર થયું હતું. આ પહેલા હાઉસ ઑફ કૉમન્સ અને હાઉસ ઑફ લૉર્ડ્સ વચ્ચે ઘણી વખત બિલ પસાર કરવામાં આવ્યું હતું.
કોમન્સમાં, ભૂતપૂર્વ વડા પ્રધાન થેરેસા મેએ આધુનિક ગુલામીનો ભોગ બનેલા લોકો માટે યુકેની એસાયલમ પ્રણાલીમાં પ્રવેશને પ્રતિબંધિત કરવાની યોજનાઓ પર બેકબેન્ચર્સના બળવાનું નેતૃત્વ કર્યું હતું.
બ્રેવરમેને બીબીસીને જણાવ્યું હતું કે “અમે આ બિલનું વચન પૂરું કરવા માટે પ્રતિબદ્ધ છીએ. આ સમસ્યાને ઠીક કરવાની જરૂર છે.” આ નવો કાયદો યુકેમાં ગેરકાયદેસર રીતે પ્રવેશ કરનારાઓને દેશનિકાલ કરતા પહેલા કેટલા સમય સુધી રોકી શકાય તે અંગેની હાલની કાનૂની મર્યાદાઓને પણ રદ કરશે.
