મધ્યપૂર્વમાં યુદ્ધનો અંત લાવવા માટે અમેરિકા અને ઇરાની પ્રતિનિધિમંડળે વચ્ચે આ સપ્તાહના અંત ભાગમાં ઇસ્લામાબાદમાં ફરી મંત્રણા યોજવાની શક્યતા છે. પાકિસ્તાનમાં પ્રથમ દોરની મંત્રણા નિષ્ફળ ગયા પછી અમેરિકાએ ઈરાના તમામ બંદરો પર નાકાબંધી કરવાની જાહેરાત કરી હતી, જ્યારે ઇરાને પણ બીજા દેશોના પોર્ટ પર હુમલા કરવાની વળતી ધમકી આપી હતી.
જોકે વૈશ્વિક ઊર્જા માર્કેટમાં સ્થિરતા લાવવા માટે બંને દેશો મંત્રણા ચાલુ રાખે તેવી શક્યતા છે. બંને પક્ષો વચ્ચે ફરી મંત્રણાના અહેવાલને પગલે ક્રૂડ ઓઇલના વૈશ્વિક ભાવ પણ મંગળવારે બેરલદીઠ 100 ડોલરથી નીચે ગયા હતા.
વાટાઘાટોમાં સામેલ એક સૂત્રે મંગળવારે જણાવ્યું હતું કે બંને દેશો આ અઠવાડિયાના અંત સુધીમાં ઇસ્લામાબાદમાં પાછા આવી શકે છે. વોશિંગ્ટન અને તેહરાનને તેમના પ્રતિનિધિમંડળો ફરીથી મોકલવાનો પ્રસ્તાવ મોકલવામાં આવ્યો છે. કોઈ ચોક્કસ તારીખ નક્કી કરવામાં આવી નથી, પરંતુ પ્રતિનિધિમંડળો શુક્રવારથી રવિવાર વચ્ચે મંત્રણા માટે પાકિસ્તાન આવે તેવી ધારણા છે.
યુએસ પ્રમુખ ડોનાલ્ડ ટ્રમ્પે દાવો કર્યો હતો કે ઈરાન સોમવારે સંપર્કમાં હતું અને એક સોદો કરવા માંગતું હતું, જોકે તેઓ એવા કોઈપણ કરારને મંજૂરી આપશે નહીં જે તેહરાનને પરમાણુ હથિયાર રાખવાની મંજૂરી આપે.
અમેરિકાએ હોર્મુઝ સ્ટ્રેટને બ્લોક કરવાની જાહેરાત કરી છે. જોકે યુએસ નાકાબંધીના લગભગ 24 કલાક પછી પણ વોશિંગ્ટને કોઇ સીધી કાર્યવાહી કરી હોય તેવા રીપોર્ટ મળ્યાં નથી. શિપિંગ ડેટા દર્શાવે છે કે મંગળવારે ઈરાન સાથે જોડાયેલા ત્રણ ટેન્કર હોર્મુઝ સ્ટ્રેટમાંથી પસાર થતા જોવા મળ્યા હતા, પરંતુ જહાજો ઈરાની બંદરો તરફ કે ત્યાંથી જઈ રહ્યા ન હતાં.ઈરાની તેલના મુખ્ય ખરીદદાર ચીને કહ્યું હતું કે યુએસ નાકાબંધી ખતરનાક અને બેજવાબદાર છે અને તેનાથી તણાવ વધશે.
અગાઉ પાકિસ્તાનની મધ્યસ્થી હેઠળની અમેરિકા-ઈરાન વચ્ચેની સીધી શાંતિ મંત્રણા શનિવારે (૧૧ એપ્રિલ) નિષ્ફળ રહી હતી. યુદ્ધનો અંત લાવવા માટે 21 કલાક ચાલેલી વાટાઘાટો નિષ્ફળ જવા માટે બંને દેશોએ એકબીજા પર દોષારોપણ કર્યું હતું. લેબનોનમાં યુદ્ધવિરામ, યુદ્ધમાં નુકસાનનું વળતર અને હોર્મુઝ સ્ટ્રેટ તથા ઇરાનના પરમાણુ કાર્યક્રમ જેવા મુદ્દા પર મડામાંઠ સર્જાઈ હતી. 1979ની ઇરાનની ઇસ્લામિક ક્રાંતિ પછી બંને દેશો વચ્ચે પ્રથમ સીધી અને ઉચ્ચસ્તરીય મંત્રણા હતી.અમેરિકી પ્રતિનિધિમંડળમાં વાઇસ પ્રેસિડન્ડ વેન્સ ઉપરાંત વિશેષ દૂત સ્ટીવ વિટકોફ અને પ્રેસિડન્ટ ડોનાલ્ડ ટ્રમ્પના જમાઈ જેરેડ કુશનરનો સમાવેશ થતો હતો. યુએસ પ્રતિનિધિમંડળમાં પ્રેસિડન્ટના નાયબ રાષ્ટ્રીય સુરક્ષા સલાહકાર એન્ડ્રુ બેકર અને એશિયન બાબતો માટે વાઇસ પ્રેસિડન્ટના ખાસ સલાહકાર માઈકલ વેન્સનો પણ સમાવેશ થતો હતો. અમેરિકન અધિકારીઓના જણાવ્યા અનુસાર વિવિધ વિષયોના અમેરિકન નિષ્ણાતો પણ ઇસ્લામાબાદમાં હાજર હતાં.
