ટાટા ગ્રૂપે હલ્દીરામના સ્નેક્સ બિઝનેસમાં 51 ટકા હિસ્સો ખરીદવા માટે વાતચીત શરૂ કરી છે. હલ્દીરામ આ બિઝનેસની વેલ્યૂ 10 બિલિયન ડોલર આંકે છે જેના માટે ટાટા જૂથ સહમત નથી. જો ટાટા અને હલ્દીરામ આ સોદો પાર પાડશે તો તેની સીધી હરીફાઈ પેપ્સી અને મુકેશ અંબાણીની રિલાયન્સ રિટેલ સાથે થશે.
આ વાતચીતથી વાકેફ સૂત્રોએ જણાવ્યું કે ટાટા જૂથે 51 ટકાથી વધારે હિસ્સો ખરીદવામાં દેખાડ્યો છે પરંતુ 10 અબજ ડોલરનું વેલ્યૂએશન વધારે પડતું લાગે છે. પરંતુ ટાટા ગ્રૂપ અને હલ્દીરામ વચ્ચે ડીલ થઈ જશે તો તે ટાટા માટે બહુ મોટી તક હશે. હલ્દીરામ એક ફેમિલી આધારિત બિઝનેસ છે જે 1937માં શરૂ થયો હતો અને તે પોતાના ક્રિસ્પી ભુજિયા માટે જાણીતો છે જે 10 રૂપિયાના નાના પેકથી શરૂ થાય છે. ભારતમાં નમકીન નાસ્તાનું બજાર લગભગ 6.2 અબજ ડોલર છે જેમાં હલ્દીરામ એકલી 13 ટકા હિસ્સો ધરાવે છે.
હલ્દીરામ અત્યારે નમકીનના બિઝનેસમાં મોટું નામ છે અને ભારતના લગભગ દરેક મોટા શહેરમાં હાજરી ધરાવે છે. તેણે ટાટા ઉપરાંત પ્રાઈવેટ ઈક્વિટી કંપની બૈન કેપિટલ સાથે પણ વાતચીત શરૂ કરી છે જેમાં તે લગભગ 10 ટકા હિસ્સો વેચવા માંગે છે.
ટાટા કન્ઝ્યુમર પ્રોડક્ટ્સ પાસે યુકેની ટી કંપની ટેટલીની માલિકી છે અને તેને ભારતમાં સ્ટારબક્સ સાથે ભાગીદારી કરી છે. હલ્દીરામનું કુલ વાર્ષિક વેચાણ 1.5 અબજ ડોલર જેટલું છે અને તેની સામે કંપનીનું વેલ્યૂએશન 10 અબજ ડોલર આંકવામાં આવે છે તેથી ટાટા જૂથ સોદો કરતા ખચકાય છે.
ટાટા કન્ઝ્યુમરને લોકો એક ટી કંપની તરીકે જુએ છે. પરંતુ હલ્દીરામ એક વિશાળ કન્ઝ્યુમર સ્પેસ ધરાવે છે અને તેની પાસે મોટો બજારહિસ્સો છે.
આ અંગે હલ્દીરામના ચીફ એક્ઝિક્યુટિવ ક્રિષન કુમાર કે ટાટા કન્ઝ્યુમર પ્રોડક્ટના પ્રવક્તા તરફથી કોઈ પ્રતિભાવ આવ્યો નથી. લેઝ ચિપ્સ માટે જાણીતી પેપ્સી પાસે પણ આ માર્કેટનો 13 ટકા હિસ્સો છે. હલ્દીરામના સ્નેક્સ સમગ્ર ભારત ઉપરાંત સિંગાપોર અને યુએસમાં પણ ઉપલબ્ધ હોય છે. આ ઉપરાંત તે લગભગ 150 રેસ્ટોરન્ટ ધરાવે છે જેમાં સ્થાનિક ફૂડ્સ, સ્વીટ્સનું વેચાણ કરે છે.
