ઇંગ્લેન્ડમાં યહૂદી સમુદાય પર ઇસ્લામિક સ્ટેટની પ્રેરણાથી હુમલો કરીને સેંકડો લોકોની હત્યાનું ષડયંત્ર ઘડવા બદલ 13 ફેબ્રુઆરીના રોજ બે શખ્સને જેલની સજા ફટકારવામાં આવી હતી. પ્રોસીક્યુટર્સના જણાવ્યા મુજબ, ગત ડિસેમ્બરમાં સિડનીના બોન્ડી બીચ પર થયેલા સામૂહિક ગોળીબાર કરતાં પણ આ હત્યાકાંડ વધુ ઘાતક હોત. પ્રેસ્ટન ક્રાઉન કોર્ટમાં ટ્રાયલ પછી 38 વર્ષીય વાલિદ સાદૌઈ અને 52 વર્ષીય અમર હુસૈનને દોષિત ઠેરવવામાં આવ્યા હતા. માન્ચેસ્ટરમાં એક યહૂદી ધાર્મિક સ્થળ પર થયેલા અન્ય એક જીવલેણ હુમલાના એક અઠવાડિયા પછી તેમની સામે આ કાર્યવાહી શરૂ થઈ હતી. પ્રોસીક્યુટર્સે જણાવ્યું હતું કે, આ બંને ઇસ્લામિક ઉગ્રવાદીઓ છે, તેઓ વધુમાં વધુ યહૂદીઓને મારવા માટે ઓટોમેટિક બંદૂકોનો ઉપયોગ કરવા ઇચ્છતા હતા. ન્યાયમૂર્તિ માર્ક વોલે સાદૌઈને ઓછામાં ઓછી 37 વર્ષની સજા અને હુસૈનને ઓછામાં ઓછી 26 વર્ષની સજા ફટકારતા કહ્યું હતું કે, ‘તમે આ હત્યાકાંડ કરવાની ખૂબ જ નજીક હતા.’
