અમેરિકામાં જસ્ટિસ ડીપાર્ટમેન્ટે ન્યૂજર્સીસ્થિત ટેકનોલોજી સર્વિસીઝ ફર્મને સ્થાનિક કર્મચારીઓની ભરતીમાં પૂર્વગ્રહ રાખવા બદલ કુલ $313,420નો દંડ ફટકાર્યો હતો. આ કંપનીએ ભરતી દરમિયાન અમેરિકન વર્કર્સને નિરાશ કરીને વિદેશી વિઝા ધારકોને પસંદ કરતી નોકરીની જાહેરાતો કરી હતી. ધ સિવિલ રાઇટ્સ ડિવિઝને જણાવ્યું હતું કે, કમ્પ્યુનલ સોફ્ટવેર ગ્રૂપ ઇન્ક. દ્વારા ગેરકાયદે નાગરિકતા પ્રતિબંધો ધરાવતી ખાલી જગ્યાઓને ભરવામાં ઇમિગ્રેશન એન્ડ નેશનાલિટી એક્ટનું ઉલ્લંઘન કર્યું છે, જે અંતર્ગત તેમાં અમેરિકન નાગરિકો અને કાયમી નિવાસીઓને પસંદ નહીં કરીને H-1B અને અન્ય હંગામી વિઝા પર આવેલા ઉમેદવારોની ભરતી કરી હતી. આ અંગે આસિસ્ટન્ટ એટર્ની જનરલ હરમીત કે. ઢિલ્લોને જણાવ્યું હતું કે, ‘અમેરિકન વર્કર્સને દેશમાં નોકરીઓ માટે અરજી કરવાથી વંચિત રાખવા ગેરકાયદે છે. એમ્પ્લોયર્સ વર્કર્સની નાગરિકતાના દરજ્જાના આધારે તેમની સાથે ભેદભાવ કરીને તેમનો કર્મચારી તરીકે અસ્વીકાર કરી શકે નહીં.’ આ મામલે થયેલા સમાધાન અનુસાર, કંપની એક અમેરિકન નાગરિકને બેક પેમાં 58,000 ડોલર ચૂકવશે. આ વ્યક્તિની તેની નાગરિકતાના દરજ્જાને કારણે પાયથોન ડેવલપર તરીકે ભરતી કરવામાં આવ્યો નહોતો. કંપની યુએસ ટ્રેઝરીને 255,420 ડોલરનો સિવિલ પેનલ્ટીનો દંડ પણ ચૂકવશે.
