એક સમયે મુંબઈથી સંચાલિત મટકા બિઝનેસ ભારતભરમાં ફેલાયેલો હતો. 1960ના દસકામાં વ્યાપેલા આ મટકા બિઝનેસની સ્ટોરી ધરાવતી સીરિઝ ‘મટકાકિંગ’ 17 એપ્રિલથી જોવા મળશે.
વિજય વર્મા આ સીરિઝમાં મુખ્ય ભૂમિકા ભજવી રહ્યો છે. તેમની સાથે કૃતિકા કામરા અને સાઈ તમ્હણેકર સહિતના કલાકારો છે. આ ઉપરાંત તેમાં પીઢ અભિનેતા અને જાણીતા વિલન ગુલશન ગ્રોવર પણ મહત્વની ભૂમિકામાં જોવા મળશે. આ સીરિઝનું દિગ્દર્શન નાગરાજ મંજુલેએ કર્યું છે. ઉલ્લેખનીય છે કે, 1975માં ફિરોઝ ખાને મટકા બિઝનેસ પર ફિલ્મ બનાવી હતી જેમાં પ્રેમનાથે મટકા કિંગની ભૂમિકા ભજવી હતી.
‘મટકા કિંગ’ની વાર્તા અને બ્રિજ ભટ્ટી નામ જોઈને ઘણા લોકોને રતન ખત્રીની યાદ આવી રહી છે. ભારત-પાકિસ્તાનના ભાગલા વખતે કરાચીથી મુંબઈ આવેલા રતન ખત્રીને જ મટકાની રમત શરૂ કરવાનો શ્રેય આપવામાં આવે છે.
જોકે આ સીરિઝ રતનના જીવન પર આધારિત હોવાનો દાવો કરતી નથી, પણ વાર્તા ઘણી મળતી આવે છે. જે કાયદો અને સિસ્ટમ આવા વિલન જેવા હીરોના ઉદયનું કારણ બને છે, તે જ તેમને તોડી પાડવા માટે પણ તત્પર રહે છે. આ માત્ર બ્રિજ ભટ્ટીની મહત્વાકાંક્ષાની વાર્તા નથી, પણ સાથે તેની પર્સનલ લાઈફ પણ વણાયેલી છે. મટકાના જોરે બ્રિજ તેની પત્ની સાથે ઘર અને ગાડી ખરીદતો દેખાય છે, પરંતુ ટ્રેલરમાં તે કૃતિકા કામરા સાથે પણ દિલનો દાવ લગાવતો જોવા મળે છે.
આ સીરિઝનું નિર્દેશન નેશનલ એવોર્ડ વિજેતા ડાયરેક્ટર નાગરાજ મંજુલે દ્વારા કરવામાં આવ્યું છે. નાગરાજ મુંબઈ અને મહારાષ્ટ્રની વાર્તાઓ પર એવી પકડ ધરાવે છે કે તેમના દ્વારા સર્જાયેલી દુનિયા જ વાર્તાનો આત્મા બની જાય છે.
