ટીવી ક્ષેત્રે અમિતાભ બચ્ચનનું નામ જેમ ‘કૌન બનેગા કરોડપતિ’ સાથે જોડાયેલું છે તેમ હવે સલમાન ખાનનું નામ પણ ‘બિગ બોસ’શો સાથે સંકળાયેલું છે. શરૂઆતમાં આ શોએ કરણ જોહર કે રોહિત શેટ્ટી જેવા હોસ્ટ સાથે પ્રયોગો કર્યા પછી સલમાન ખાન આ શોની ઓળખ બની ગયો છે. હવે 30 ઓગસ્ટથી ‘બિગ બોસ 19’ શરૂ થઈ રહ્યું છે, ત્યારે આ વખતે બિગ બોસ હાઉસના મહેમાનો કોણ હશે, તે અંગે ચર્ચાઓ અને ધારણાઓ શરૂ થઈ ગઈ છે. એવા પણ અહેવાલો છે તે આ વખતની સીઝન આગળની બધી સીઝન કરતાં સૌથી લાંબી સીઝન હશે. ત્યારે આ વખતની સીઝન માટે સલમાન ખાન કેટલી ફી વસૂલશે, તેના પર પણ ચર્ચાઓ શરૂ થઈ ગઈ છે.
આ શો સાથે સંકળાયેલા સૂત્રોના જણાવ્યા મુજબ, એવી ચર્ચા છે કે સલમાન ખાને આ સીઝન માટે 150 કરોડ જેટલી ફી લેશે. આ સીઝન માટે સલમાન ખાન લગભગ 15 અઠવાડિયા શૂટ કરશે અને તેને દર વીકેન્ડ દીઠ 8 થી 10 કરોડ રૂપિયા ચૂકવાશે. એવું પણ કહેવાય છે કે, આ શો ઓટીટી પર સ્ટ્રીમ થવાનો હોવાથી દરરોજ ટીવી પર તેનું રિપીટ ટેલિકાસ્ટ થશે, જેમાં ઓટીટી સિવાયની ફૂટેજ પણ જોવા મળી શકે છે. આમ આ વખતનો શો માત્ર ઓટીટી કે માત્ર ટીવી પર સિમિત નહીં રહે. સલમાન અને ઘરના ગેસ્ટની ફીને પહોંચી વળવા માટે શોના મેકર્સ આ વખતે પહેલાંની કોઈ સીઝન જેટલો ખર્ચ કરવા ઇચ્છતા નથી. આ સીઝનનું બજેટ આગળની સીઝન જેટલું મોટું નથી.
સલમાન ખાને આ પહેલાં પણ બિગ બોસ ઓટીટી 2નું સંચાલન કર્યું હતું, એ વખતે તેણે 96 કરોડ રૂપિયા ફી પેટે લીધાં હતાં. જ્યારે બિગ બોસની 18મી સીઝન માટેની તેની ફી 250 કરોડ હતી. જ્યારે બિગ બોસ 17ની ફી 200 કરોડ હતી. એ બંને શો માત્ર ટીવી પર જ આવ્યા હતા. આ વખતે સલમાન ‘ગલવાન’માં પણ વ્યસ્ત હોવાથી તે પહેલાં જેટલો સમય આ શોને આપી શકે તેમ નથી. સાથે જ આ સીઝન અન્ય સીઝન કરતાં લાંબી હોવાથી સાથે બજેટ પણ ઓછું રાખી શકાય તે માટે મેકર્સ વચ્ચે અમુક બીજા સંચાલકોની પણ મદદ લેશે એવી ચર્ચા છે. તેથી આ વખતે તેની ફી ગઈ ઓટીટી સીઝન કરતાં વધારે હશે.
આ વખતની સીઝન ડિજિટલ પ્લેટફર્મ પર પહેલાં આવવાની હોવાથી અને તેનું નામ ‘બિગ બોસ 19’ અપાયું હોવાથી, મેકર્સનો વિચાર એવો છે કે તેઓ આ શોને એવી કોઈ ટૅગ લાઇન આપશે, જે ડિજીટલ વર્ઝનને પણ ન્યાય આપી શકે અને ટીવી પર પણ ચાલે. સોશિયલ મીડિયા પર ચાલતા બિગ બોસની અપડેટ માટેના એક ફેન અકાઉન્ટ પર થોડાં દિવસો પહેલા એવી પોસ્ટ મુકવામાં આવી હતી તે સલમાન ખાને 21 જુલાઈ, સોમવારે શોના પ્રોમોનું શૂટ કરી લીધું છે, જે રાતના 2 વાગ્યા સુધી ચાલ્યું હતું. ઘરમાં ચાલતા રાજકારણની થીમ પર આ પ્રોમો શૂટ કરવામાં આવ્યો છે.
બિગ બોસની આ સીઝન લગભગ 5 મહિના ચાલશે, તેમાં પહેલાં ત્રણ મહિના સલમાન ખાન દ્વારા હોસ્ટ કરવામાં આવશે, ત્યાર પછી અન્ય ગેસ્ટ હોસ્ટ આ શોનું સંચાલન કરશે. જેમાં ફરાહ ખાન, કરણ જોહર અને અનિલ કપૂરના નામની ચર્ચા છે. આ વખતની સીઝન જિઓ હોટ સ્ટાર પર 30 ઓગસ્ટથી સ્ટ્રીમ થશે. પહેલાં ઓટીટી પર એપિસોડ આવશે અને તેની અડધા કલાક પછી કલર્સ ટીવી પર એપિસોડ જોઈ શકાશે.
