એશિયા કપ ટી20 ક્રિકેટ ટુર્નામેન્ટમાં બુધવારે બાંગ્લાદેશને 41 રનથી આસાનીથી હરાવીને ભારતે આ ટુર્નામેન્ટની ફાઇનલમાં પ્રવેશ કર્યો હતો. આક્રમક ઓપનર અભિષેક શર્માએ ટુર્નામેન્ટમાં તેનું ફોર્મ જાળવી રાખીને વધુ એક શાનદાર અડધી સદી ફટકારી હતી, જ્યારે બોલિંગમાં સ્પિનર કુલદીપ યાદવે તરખાટ મચાવ્યો હતો.
પ્રથમ બેટિંગ કરતાં ભારતે તેની 20 ઓવરમાં છ વિકેટે 168 રન કર્યાં હતાં. તેના જવાબમાં બાંગ્લાદેશ 19.3 ઓવરમાં 127 રન કરી શક્યું હતું. બાંગ્લાદેશે ટોસ જીતીને ભારતને પ્રથમ બેટિંગ કરવાનું આમંત્રણ આપ્યું હતું. ઓપનર અભિષેક શર્મા 37 બોલમાં પાંચ સિક્સર સાથે 75 રન ફટકાર્યા હતાં. શુભમન ગિલ 19 બોલમાં 29 રન ફટકારીને રિશાદનો પહેલો શિકાર બન્યો હતો. તેને બે ચોગ્ગા ઉપરાંત એક સિક્સર ફટકારી હતી. શિવમ દૂબે માત્ર બે રન કરીને આઉટ થઈ ગયો હતો. કેપ્ટન સૂર્યકુમાર યાદવ (05) પણ સસ્તામાં આઉટ થઈ ગયો હતો
કેપ્ટન સૂર્યકુમાર યાદવ અને અભિષેકની વિકેટ ઉપરા ઉપરી પડી ગયા બાદ જવાબદારી હાર્દિક પંડ્યા પર આવી ગઈ હતી અને 20મી ઓવરના છેલ્લા બોલે આઉટ થતાં અગાઉ હાર્દિકે 29 બોલમાં 38 રન ફટકાર્યા હતા. અક્ષર પટેલ દસ રન સાથે અણનમ રહ્યો હતો તો તિલક વર્મા માત્ર પાંચ રન કરી શક્યો હતો.
બાંગ્લાદેશ માટે ઓપનર સૈફ હસને એક લડાયક બેટિંગ કરી હતી. નવમી વિકેટના રૂપમાં આઉટ થતાં અગાઉ તેણે 51 બોલમાં પાંચ સિક્સર અને ત્રણ ચોગ્ગા સાથે 69 રન ફટકાર્યા હતાં. સૈફ હસન સિવાય બાંગ્લાદેશનો કોઈ બેટર ભારતીય બોલિંગ આક્રમણ સામે ટકી શક્યો ન હતો. પરવેઝ હસન ઇમોને 21 રન ફટકાર્યા તે સિવાય ટીમનો એકેય બેટર ડબલ ફિગર સુધી પહોંચી શક્યો ન હતો.
ભારત માટે કુલદીપ યાદવે 18 રનમાં ત્રણ વિકેટ લીધી હતી. જસપ્રિત બુમરાહ અને વરુણ ચક્રવર્તીએ બે બે વિકેટ લીધી હતી.
