શ્રીલંકા, ઇન્ડોનેશિયા અને થાઇલેન્ડમાં સર્જાયેલી વિવિધ કુદરતી આપત્તિની વિવિધ ઘટનાઓમાં સેંકડો લોકોના મોત થયા હતાં. આવી ઘટનાઓના કારણે ભારે તબાહી સર્જાઈ હતી. વાવાઝોડા, પૂર અને ભૂસ્ખલનથી શ્રીલંકામાં 56, થાઇલેન્ડમાં 145 અને ઇન્ડોનેશિયાના સુમાત્રામાં 164 લોકોના મોત થયા હતાં. આ કુદરતી આપત્તિમાં અનેક લોકો લાપતા અને વિસ્થાપિત બન્યાં હતાં. ભારતે દિતવા સાયક્લોનથી અસર પામેલા શ્રીલંકાને ઓપરેશન સાગરબંધુ હેઠળ નેવીના માધ્યમથી તાત્કાલિક પૂર રાહત સામગ્રી મોકલી હતી. નવી દિલ્હીએ અનાજ અને પેકેજ્ડ ફૂડ, બેકરી પ્રોડક્ટ્સ અને બીજા સામગ્રી સહિત અત્યાર સુધીમાં 4.5 ટન સૂકું રાશન અને 2 ટન તાજું રાશન મોકલ્યું હતું.
શ્રીલંકામાં સાયક્લોનને કારણે ભારે વરસાદથી અચાનક પૂર આવ્યું હતું અને છેલ્લાં 72 કલાકમાં ઓછામાં ઓછા 56 લોકોના મોત હતાં અને 21 ગુમ થયા હતાં. ઇમર્જન્સીની સ્થિતિને ધ્યાનમાં રાખીને સરકારે શુક્રવારે જાહેર રજા જાહેર કરી હતી. 43,991 લોકો પ્રભાવિત થયા હતાં. શ્રીલંકન એરલાઇન્સે ઘણી ફ્લાઇટ્સ ભારતના કોચી અને ત્રિવેન્દ્રમ અને મટ્ટાલા એરપોર્ટ તરફ ડાઇવર્ટ કરી હતી.
વડાપ્રધાન હરિની અમરસુરિયાની સરકારે મદદ માટે આંતરરાષ્ટ્રીય અપીલ કરી હતી. સુમાત્રામાં ભારે વરસાદથી નદીઓ પૂર આવ્યું હતું. તેમાં અનેક લોકોને તણાયા હતાં અને 3,200થી વધુ ઘરો અને બિલ્ડિંગ્સ ડૂબી ગઈ હતી. આશરે 3,000 પરિવારો વિસ્થાપિત બન્યાં હતાં. પશ્ચિમ સુમાત્રામાં 17,000 ઘરો પાણીમાં ગરકાવ થયાં હતાં અને 23,000એ કામચલાઉ આશ્રયસ્થાનોમાં જવાની ફરજ પડી હતી.
