ઓસ્ટ્રેલિયાના 62 વર્ષીય વડાપ્રધાન એન્થની અલ્બેનીઝે શનિવારે બીજા લગ્ન કર્યા હતા. તેમણે તેમની લાંબા સમયની પાર્ટનર 47 વર્ષીય જોડી હેયડન સાથે લગ્ન કર્યા હતા. તેઓ હવે અધિકૃત રીતે ઓસ્ટ્રેલિયાના ફર્સ્ટ લેડી બની ગયા છે. જોડી હેયડન ફાયનાન્સિયલ સર્વિસીસ પ્રોફેશનલ અને વિમેન એડવોકેટ છે. ઓસ્ટ્રેલિયાના ઈતિહાસમાં આ પ્રથમવાર એવી ઘટના બની છે કે, કોઈ વ્યક્તિએ વડાપ્રધાન પદ પર રહીને લગ્ન કર્યા હોય. જોડી હેયડન લાંબા સમયથી અલ્બેનીઝ સાથે જાહેર કાર્યક્રમોમાં જોવા મળતા હતા. 2022ના ચૂંટણી પ્રચાર દરમિયાન પણ તેઓ તેમની સાથે હતા અને આ વર્ષે મે મહિનામાં તેમની લેબર પાર્ટીની વિજય દરમિયાન પણ સાથે હતા. ગત વર્ષે વેલેન્ટાઈન ડે પર અલ્બેનીઝે હેયડન સમક્ષ પ્રેમનો પ્રસ્તાવ મુક્યો હતો.
કેનબેરામાં વડાપ્રધાનના નિવાસસ્થાન ‘ધ લોજ’ ખાતે યોજાયેલા આ સાદા લગ્ન સમારોહમાં માત્ર નજીકના પરિવારજનો અને મિત્રો જ સામેલ રહ્યા હતા. જોકે, આ લગ્ન સમારંભની તારીખ અને તૈયારીઓ સંપૂર્ણપણે ખાનગી રાખવામાં આવી હતી. વડાપ્રધાન ઓફિસના એક નિવેદનમાં અલ્બાનીઝે કહ્યું કે, ‘અમે પોતાના પરિવાર અને નજીકના મિત્રો સામે એકબીજા પ્રત્યેના પોતાનો પ્રેમ અને જીવનભર સાથ નિભાવવાની કટિબદ્ધતા વ્યક્ત કરીને ખૂબ ખુશ છીએ.’ એન્થની અલ્બાનીઝના આ બીજા લગ્ન છે. તેમણે અગાઉ કાર્મેલ ટેબટ સાથે 2000માં લગ્ન કર્યા હતા. NSWના પૂર્વ રાજનેતા કાર્મેલ ટેબટ સાથે એન્થનીના 19 વર્ષના દામપત્ય જીવનનો 2019માં અંત આવ્યો. પહેલા લગ્નથી તેમને એક પુત્ર પણ છે.
