દિલ્હી પોલીસની આર્થિક ગુના શાખાએ નેશનલ હેરાલ્ડ કેસમાં કોંગ્રેસના નેતાઓ સોનિયા, ગાંધી, રાહુલ ગાંધી, સેમ પિત્રોડા અને અન્ય સાત સામે ગુનાહિત કાવતરા સહિતના આરોપ હેઠળ FIR દાખલ કરી હતી. પોલીસની આ કાર્યવાહી સામે આકરી પ્રતિક્રિયા આપતાં કોંગ્રેસે આક્ષેપ કર્યો હતો કે મોદી-શાહની જોડી પાર્ટીના ટોચના નેતૃત્વ સામે ધાકધમકી અને બદલાની રાજનીતિ કરી રહી છે.
આ કાર્યવાહીની નિંદા કરતા કોંગ્રેસના મહામંત્રી જયરામ રમેશે જણાવ્યું હતું કે મોદી-શાહની જોડી કોંગ્રેસની ટોચની નેતાગીરી સામે ધાકધમકી અને બદલાની રાજનીતિ ચાલુ રાખી છે. જેઓ ધમકી આપે છે તેઓ પોતે જ અસુરક્ષિત અને ભયભીત છે. નેશનલ હેરાલ્ડ મામલો સંપૂર્ણપણે બોગસ કેસ છે. ન્યાયનો વિજય આખરે થશે.
કોંગ્રેસના પ્રવક્તા અને વરિષ્ઠ વકીલ અભિષેક મનુ સિંઘવીએ X પરની એક પોસ્ટમાં જણાવ્યું હતું કે FIRમાં નવો દારૂ, નવી બોટલ, નવો ગ્લાસ પણ નથી. આ કેસનો જાદૂ એ છે કે તેમાં કોઇ નાણા કે પ્રોપર્ટી ટ્રાન્સફર થઈ નથી. આમ છતાં યંગ ઈન્ડિયનની રચના પછી ફક્ત AJLના શેર રાખવા માટે બિન-લાભકારી કંપનીમાંથી મની લોન્ડરિંગના આરોપની શોધ કરાઈ છે. વિડંબના એ છે કે યંગના ડિરેક્ટર તરીકે ગાંધી પરિવાર અને બીજા કોંગ્રેસી નેતાઓ ડિવિડન્ડ મેળવી શકતા નથી, નફો વહેંચી શકતા નથી અને એક પણ લાભ મેળવી શકતા નથી.
આ હાઇપ્રોફાઇલ કેસમાં મની લોન્ડરિંગ તપાસના ભાગરૂપે ઇડીએ દાખલ કરેલી ફરિયાદના આધારે દિલ્હી પોલીસે સોનિયા ગાંધી, રાહુલ ગાંધી, સુમન દુબે, સામ પિત્રોડા, તથા યંગ ઇન્ડિયન, યંગ ઇન્ડિયન (YI) અને ડોટેક્સ મર્ચેન્ડાઇઝ , ડોટેક્સના પ્રમોટર સુનિલ ભંડારી, એસોસિએટેડ જર્નલ્સ લિમિટેડ (AJL) અને અજાણ્યા વ્યક્તિઓ સામે ફરિયાદ દાખલ કરી છે. આ કેસમાં IPCની કલમ 120B (ગુનાહિત કાવતરું), 403 (સંપત્તિનો અપ્રમાણિક દુરુપયોગ), 406 (વિશ્વાસ ભંગ બદલ સજા) અને 420 (છેતરપિંડી) હેઠળ આરોપો મૂકાયા છે.
