ભારત અને ઓમાન વચ્ચે ગુરુવારે મુક્ત વેપાર કરાર પર હસ્તાક્ષર થયાં હતાં. વડાપ્રધાન નરેન્દ્ર મોદીએ સુલતાન હૈથમ બિન તારિક સાથેની મસ્કતમાં બેઠક બેઠક પછી આ કરાર થયા હતાં. બંને નેતાઓએ દ્વિપક્ષીય વ્યૂહાત્મક ભાગીદારીને વધુ ગહન બનાવવા માટેનો વિચારવિમર્શ કર્યો હતો. આ દરમિયાન ઓમાન સરકારે દ્વિપક્ષીય સંબંધોને મજબૂત કરવામાં યોગદાન માટે વડાપ્રધાન મોદીને સર્વોચ્ચ નાગરિક સન્માન ‘ઓર્ડર ઓફ ઓમાન’થી સન્માનિત કર્યા હતાં.
ત્રણ દેશોના પ્રવાસના છેલ્લા તબક્કામાં બુધવારે ઓમાન પહોંચેલા મોદીનું મસ્કતના અલ બરાકા પેલેસમાં સુલતાન હૈથમ સ્વાગત કર્યું હતું. વિદેશ મંત્રાલયના પ્રવક્તા રણધીર જયસ્વાલે જણાવ્યું હતું કે, બેઠક દરમિયાન, બંને નેતાઓએ નોંધ્યું હતું કે ભારત અને ઓમાન વચ્ચેના રાજદ્વારી સંબંધોના 70 વર્ષ પૂર્ણ થવા એ દ્વિપક્ષીય ભાગીદારીમાં એક સીમાચિહ્નરૂપ છે.
બંને નેતાઓએ દ્વિપક્ષીય સંબંધોમાં એક સીમાચિહ્નરૂપ તરીકે વ્યાપક આર્થિક ભાગીદારી કરાર (CEPA) પર હસ્તાક્ષરનું સ્વાગત કર્યું હતું તથા ભારત-ઓમાન વ્યૂહાત્મક ભાગીદારીને નોંધપાત્ર રીતે મજબૂત બનાવવાની પ્રતિબદ્ધતા વ્યક્ત કરી હતી.
બંને નેતાઓએ સંરક્ષણ, સુરક્ષા, વેપાર અને રોકાણ, ઉર્જા, કૃષિ, ટેકનોલોજી, નવા અને ઉભરતા ક્ષેત્રો, સંસ્કૃતિ અને લોકો વચ્ચેના સંબંધો સહિતના વિવિધ વિષયો પર વિચારોનું આદાન-પ્રદાન કર્યું. તેમણે પ્રાદેશિક અને વૈશ્વિક હિતના મુદ્દાઓ પર પણ ચર્ચા કરી હતી.
વાણિજ્ય અને ઉદ્યોગ પ્રધાન પીયૂષ ગોયલ અને ઓમાનના વાણિજ્ય, ઉદ્યોગ અને રોકાણ પ્રમોશન પ્રધાન કૈસ બિન મોહમ્મદ અલ યુસુફ દ્વારા હસ્તાક્ષર કરાયેલ CEPAને પગલે બજાર પ્રવેશમાં વધારો કરવામાં, રોકાણોને પ્રોત્સાહન આપવામાં અને મુખ્ય ક્ષેત્રોમાં સહયોગને મજબૂત બનાવવામાં મદદ મળશે.
ગલ્ફ કોઓપરેશન કાઉન્સિલ (GCC) દેશોમાં ઓમાન ભારત માટે ત્રીજું સૌથી મોટું નિકાસ સ્થળ છે. ભારતનો GCC સભ્ય UAE સાથે પણ આવો જ કરાર છે, જે મે 2022માં અમલમાં આવ્યો હતો.
૨૦૨૪-૨૫માં ભારત-ઓમાન દ્વિપક્ષીય વેપાર લગભગ ૧૦.૫ અબજ ડોલર (૪ અબજ ડોલર નિકાસ અને ૬.૫૪ અબજ ડોલર આયાત) હતો. ભારતની મુખ્ય આયાત પેટ્રોલિયમ પેદાશો અને યુરિયા છે, જે કુલ આયાતના આશરે 70 ટકા થાય છે. ભારત પ્રોપીલીન અને ઇથિલિન પોલિમર, પેટ કોક, જીપ્સમ, રસાયણો, આયર્ન અને સ્ટીલ અને અનરોટ એલ્યુમિનિયમની પણ આયાત કરે છે.
ઓમાનમાં ભારતની નિકાસની મુખ્ય વસ્તુઓમાં મિનિરલ ફ્યુઅલ, રસાયણો, કિંમતી ધાતુઓ, લોખંડ અને સ્ટીલ, અનાજ, જહાજો, બોટ, ઇલેક્ટ્રિકલ મશીનરી, બોઇલર, ચા, કોફી, મસાલા, વસ્ત્રો અને ખાદ્ય વસ્તુઓનો સમાવેશ થાય છે.
