બોલીવૂડમાં એક તરફ યુવાન કલાકારો આઠ કલાકની શિફ્ટની માગણી કરી રહ્યા છે ત્યારે બીજી તરફ પીઢ અભિનેકા અમિતાભ બચ્ચન એક જ દિવસમાં કેબીસીના ત્રણ એપિસોડનું શૂટિંગ કરી રહ્યા છે. 83 વર્ષીય અમિતાભ સવારે નવ વાગ્યાથી લઇને મોડી રાત સુધી કામ કરે છે.
તેઓ કામની બાબતે શિસ્ત અને સમર્પણને પ્રાથમિકતા આપે છે. તેઓ છેલ્લા 25 વર્ષથી કૌન બનેગા કરોડપતિ-શો સાથે કામ કરી રહ્યા છે. તાજેતરમાં પોતાની વેબ સિરીઝના પ્રમોશન માટે શારીબ હાશ્મી કેબીસીના મહેમાન બન્યા હતા. તેઓ કેબીસી17ના શૂટમાં અમિતાભ બચ્ચનથી ખુબ પ્રભાવિત થયા છે.
શારીબે અમિતાભ બચ્ચનની કામ કરવાની ક્ષમતા અંગે કહ્યું હતું કે, ‘તેમની એનર્જીની તો વાત જ થાય એમ નથી, એમને સલામ છે. આ ઉંમરે એ એક જ દિવસમાં ત્રણ એપિસોડ શૂટ કરે છે. એ 9 વાગ્યે સવારે સેટ પર પહોંચી જાય છે અને મોડી રાત સુધી શૂટ ચાલે છે. અમારો એપિસોડ રાત્રે 12 વાગ્યા સુધી શૂટ થયો હતો, અમારો એપિસોડ એ દિવસનો છેલ્લો એપિસોડ હતો. એમાં પણ એમની એનર્જી એવીને એવી જ હતી, અમે અમુક ક્ષણો માટે ઝોંકા ખાઈ જતાં હોય એવું થયું. એક જમાનાના સુપર હીરો એમ નથી બની જવાતું! તેઓ ત્રણ એપિસોડ સુધી એક સરખો ઉત્સાહ જાળવી રાખે છે. તેમની આ તાકાત અને ઉત્સાહ માત્ર દરેક પેઢીના દર્શકો જ નહીં પણ કલાકારોને પણ પ્રેરણા આપે છે.’
