લંડનની ઓશવાલ નોર્થ વેસ્ટ ગુજરાતી સ્કૂલ દ્વારા સ્થાપનાની 50મી વર્ષગાંઠની શાનદાર ઉજવણી કરવામાં આવી હતી. આ પ્રસંગે ગુજરાતી ભાષાના પ્રચાર પ્રસાર માટે ખૂબ જ મહેનત કરનાર હેરો વેસ્ટના એમપી શ્રી ગેરેથ થોમસ ઉપસ્થિત રહ્યા હતા.
સમારોહમાં હાજર વિદ્યાર્થીઓને ઉપસ્થિત રહેલા શિક્ષકોને મળીને આનંદ થયો હતો તેજ રીતે શાળાને આકાર આપનારા સમર્પિત શિક્ષકો પણ પોતાના જુના વિદ્યાર્થીઓને મળીને ખુશ થયા હતા.
એમપી શ્રી ગેરેથ થોમસે જણાવ્યું હતુ કે ‘’ગુજરાતી ડાયસ્પોરા હેરોના સમુદાય અને હેરોના ઇતિહાસનો એક મહત્વપૂર્ણ ભાગ છે. મેં લાંબા સમયથી શનિવાર અને રવિવારની કોમ્યુનિટી લેંગ્વેજ સ્કૂલોમાં શિક્ષકો માટે વધુ સમર્થન માટે ઝુંબેશ ચલાવી છે. તેમના અમૂલ્ય કૌટુંબિક અને સાંસ્કૃતિક લાભો ઉપરાંત, આ ભાષાઓ ભવિષ્યના વેપાર અને સુરક્ષા સંબંધો બનાવવામાં મહત્વપૂર્ણ ભૂમિકા ભજવે છે. હું આ વર્ષના અંતમાં ગુજરાતી ભાષા શિક્ષણ પર બીજી એક પરિષદનું આયોજન કરવા અને આપણી કોમ્યુનિટી સ્કૂલોના અદ્ભુત કાર્યની ઉજવણી કરવાનું ચાલુ રાખવા માટે આતુર છું.’’
