અમદાવાદના મ્યુનિસિપલ કમિશનર બંછાનિધિ પાનીએ બુધવાર, 4 ફેબ્રુઆરીએ અમદાવાદ મ્યુનિસિપલ કોર્પોરેશન (AMC)નું નાણાકીય વર્ષ 2026-27 માટેનું ડ્રાફ્ટ બજેટ રજૂ કર્યું હતું. 2030માં અમદાવાદમાં કોમનવેલ્થ ગેમ્સ યોજાઈ રહી હોવાથી આ વખતે ઇન્ફ્રાસ્ટ્રક્ચર, અર્બન કનેક્ટિવિટી, સ્પોર્ટ્સ કોમ્પ્લેક્સ પર વિશેષ ભાર મૂકાયો હતો. જોકે નવા બજેટમાં કરવેરામાં વધારાની કોઇ દરખાસ્ત કરાઈ નથી.
બજેટની દરખાસ્ત મુજબ 6 મોટા અને 5 મિની સહિત કુલ 11 સ્પોર્ટસ કોમ્પ્લેક્સનું નિર્માણ કરાશે. આ ઉપરાંત બોપલ રિંગ રોડથી ઘુમા, નહેરુનગરથી શિવરંજની, રામદેવનગરથી ઇસ્કોન વચ્ચે એલિવેટેડ કોરિડોરની જાહેરાત કરાઈ હતી. ટ્રાફિકને સરળ બનાવવા માટે 3 નવા ફ્લાયઓવર અને 5 રેલવે બ્રિજ બનાવવામાં આવશે.
કમિશનર પાનીએ સ્પષ્ટતા કરી હતી કે આ વર્ષે કોઈ નવો ટેક્સ વધારો કરાશે નહીં. બે વર્ષ પહેલાં બજેટમાં બે ટકાનો વાર્ષિક કર વધારો પહેલાથી જ સામેલ કરવામાં આવ્યો હતો, તેથી કોઈપણ નવી જાહેરાત વિના આપમેળે વધારો ચાલુ રહે છે. ડ્રાફ્ટ બજેટનો ઉદ્દેશ્ય અમદાવાદના શહેરી માળખાગત સુવિધાઓને વધારવાનો છે, સાથે સાથે રમતગમત અને મનોરંજન સુવિધાઓને પ્રોત્સાહન આપવાનો છે, જે ભવિષ્યના વિકાસ અને નાગરિક ચૂંટણીઓની તૈયારીમાં શહેરની વિકાસની મહત્વાકાંક્ષાઓને પ્રતિબિંબિત કરે છે.
