અંડર-19 ક્રિકેટ વર્લ્ડ કપ 2026ની હરારેમાં શુક્રવાર, 6 ફેબ્રુઆરીએ રમાયેલી ફાઇનલમાં ભારતે ઇંગ્લેન્ડને 100 રનથી હરાવી રેકોર્ડ છઠ્ઠી વખત U19 ક્રિકેટ વર્લ્ડ કપનો ખિતાબ જીત્યો હતો. આયુષ મ્હાત્રેના નેતૃત્વ હેઠળના ભારતીય ટીમ માટે આ એક ઐતિહાસિક જીત હતી, કારણ કે ટીમે U19 વર્લ્ડ કપ ફાઇનલમાં રનના સંદર્ભમાં સૌથી મોટા માર્જિનથી વિજયનો વિશ્વ રેકોર્ડ બનાવ્યો હતો.
આ ટાર્ગેટનો પીછો કરતાં કાલેબ ફાલ્કનરની 67 બોલમાં 115 રનની શાનદાર ઇનિંગ સાથે ઇંગ્લેન્ડે પણ વળતી લડી આપી હતી, જોકે ટીમ 40.2 ઓવરમાં 311 રને ઓલઆઉટ થઈ ગઈ હતી. ભારત તરફથી આર.એસ અંબરીશે 3 વિકેટ ઝડપી હતી. ઇંગ્લેન્ડ માટે કાલેબ ફોલ્કનરે 115 રન બનાવ્યા હતા. તેને એક છેડેથી લડત આપી હતી, પરંતુ બીજા છેડેથી સતત વિકેટો પડતી રહી હતી.
14 વર્ષીય વૈભવ સૂર્યવંશીની 80 બોલમાં 175 રનની તોફાની ઇનિંગ સાથે ભારતે 50 ઓવરમાં નવ વિકેટે 411નો જંગી સ્કોર ખડો કર્યો હતો. ફાઈનલ મેચમાં ભારતે પ્રથથમ વાર આટલો મોટો સ્કોર બનાવ્યો હતો અને તે અત્યાર સુધીના અંડર-19 વર્લ્ડ કપના ઈતિહાસમાં ફાઈનલ મેચનો સૌથી મોટો સ્કોર બની ગયો હતો.
સુર્યવંશીએ ફક્ત 55 બોલમાં સદી કરી હતી, જે U19 વર્લ્ડ કપમાં કોઈ ભારતીય દ્વારા સૌથી ઝડપી સદી હતી. આ ભારતીય સ્ટાર ખેલાડીએ માત્ર 80 બોલમાં 218.75ની સ્ટ્રાઈક રેટથી 15 ચોગ્ગા અને 15 છગ્ગા સાથે કુલ 175 રન ફટકારીને આઉટ થતાં પહેલા અનેક રેકોર્ડ તોડ્યાં હતાં.
પ્રથમ બેટિંગ કરવાનો નિર્ણય લેતા, ભારતે ચોથી ઓવરમાં એરોન જ્યોર્જને સસ્તામાં ગુમાવી દીધો હતો. જોકે સૂર્યવંશી અને કેપ્ટન આયુષ મ્હાત્રેએ બીજી વિકેટ માટે 142 રન ઉમેરીને ટીમને મજબૂત સ્થિતિમાં મૂકી હતી. મ્હાત્રે 19મી ઓવરમાં 53 રન બનાવીને આઉટ થયો હતો. સૂર્યવંશી એક જ U19 વર્લ્ડ કપમાં સૌથી વધુ છગ્ગા ફટકારનાર બેટ્સમેન પણ બન્યો હતો.
ભારતની અંડર-19 ટીમ સતત છઠ્ઠી અને કુલ 10મી વખત વર્લ્ડકપની ફાઈનલમાં પહોંચી હતી. જે પણ એક રેકોર્ડ છે. ભારતીય ટીમ અત્યાર સુધીમાં વર્ષ 2000, 2008, 2012, 2018 અને 2022 એમ 5 વખત અંડર-19 વર્લ્ડકપની ફાઈનલ જીતી ચૂકી છે. બીજી તરફ ઈંગ્લેન્ડની ટીમે અત્યાર સુધીમાં માત્ર એક જ વખત વર્લ્ડકપ જીત્યો હતો.
