વિવિધ પ્રકારની વેબ સીરિઝ માટે જાણીતા ડિજિટલ પ્લેટફોર્મ- નેટફ્લિક્સ દ્વારા તાજેતરમાં જુદી જુદી સીરિઝ અને ફિલ્મોની યાદી જાહેર કરવામાં આવી હતી. જે મુજબ સન્ની દેઓલ અને અક્ષય ખન્ના 28 વર્ષ પછી ફરી સાથે જોવા મળશે. તે બંને ‘બોર્ડર’ પછી નેટફ્લિક્સની નવી લીગલ ડ્રામા સિરીઝ ‘ઇક્કા’માં કામ કરી રહ્યા છે. આ સિરીઝમાં સન્ની દેઓલ એક ઈમાનદાર અને સન્માનનીય વકીલની ભૂમિકામાં દેખાશે, જેમાં તેનું પાત્ર 1993ની ફિલ્મ ‘દામિની’ જેવું હશે તેવું માનવામાં આવે છે. જ્યારે અક્ષય ખન્ના આ ડ્રામામાં વિલનનો રોલ ભજવશે. સિરીઝનું દિગ્દર્શન સિદ્ધાર્થ પી. મલ્હોત્રાએ કર્યું છે. તેમની સાથે દિયા મિર્ઝા, તિલ્લોત્તમા શોમ અને ‘હીરામંડી’ ફેમ સંજીદા શેખ પણ મહત્વપૂર્ણ રોલમાં જોવા મળશે.
તાપસી પન્નુની ‘ગાંધારી’
આ યાદી મુજબ, નેટફ્લિક્સે તાપસી પન્નુ અભિનિત ફિલ્મ‘ગાંધારી’ના ફર્સ્ટ-લૂકની તસવીરો પણ રિલીઝ કરી છે. તસવીરો સાથે ઇન્સ્ટાગ્રામ પર લખવામાં આવ્યું હતું કે, “તમે માતાનો પ્રેમ જોયો છે. હવે તેનો ગુસ્સો જુઓ. ‘ગાંધારી’ જુઓ, જલ્દી આવી રહી છે.” આ ફિલ્મનું દિગ્દર્શન દેવાશિષ માખીજાએ કર્યું છે અને તેની લેખિતા અને નિર્માત્રી કનિકા ઢિલ્લોન છે. આ ફિલ્મમાં ઈશ્વાક સિંહ પણ મહત્વની ભૂમિકામાં છે.
અનિલ કપૂરની ‘ફેમિલી બિઝનેસ’
હંસલ મહેતાની નવી ડ્રામા સિરીઝ ‘ફેમિલી બિઝનેસ’માં અનિલ કપૂર અને વિજય વર્મા સાથે જોવા મળશે. તેની કહાની સત્તા, લોહીના સબંધ અને વિશ્વાસઘાત કેન્દ્રિત છે. તેમાં અનિલ કપૂર એક દીર્ઘદૃષ્ટા અબજોપતિની ભૂમિકા ભજવશે, જે બોર્ડ દ્વારા નિયુક્ત થયેલા નવા આવતા ટાયકૂન (વિજય વર્મા)ને પોતાનું સ્થાન સંભાળવા માટે માર્ગદર્શન આપે છે. જોકે, થોડા મહિના બાદ વિજયને નોકરીમાંથી કાઢી મુકવામાં આવે છે અને મેન્ટર અનિલ કપૂર ફરી પોતાનું સ્થાન પાછું લઈ લે છે. ત્યારબાદ વિજય બળવો કરે છે અને આ કોર્પોરેટની ટક્કર એક ઘર્ષણમાં તબદિલ થાય છે.
રાજકુમાર રાવ-સાન્યા મલ્હોત્રાની ‘ટોસ્ટર’
રાજકુમાર રાવ અને સાન્યા મલ્હોત્રાની કોમેડી ડ્રામા ફિલ્મ ‘ટોસ્ટર’નો પણ ફર્સ્ટ-લુક રિલીઝ થયો છે. વિવેક દાસ ચૌધરી દિગ્દર્શિત આ ફિલ્મમાં એક કંજુસ વ્યક્તિની કહાની છે, જેને એક ટોસ્ટરનો અતિશય મોહ છે અને તેની આસપાસ હત્યા અને અફરાતફરી સર્જાય છે. આ ફિલ્મ પત્રલેખા અને રાજકુમાર રાવની પ્રોડક્શન કંપની ‘કંપા ફિલ્મ્સ’ના બેનર હેઠળ નિર્મિત પ્રથમ ફિલ્મ છે.
સૈફ અલી ખાન-પ્રતીક ગાંધીની ‘હમ હિંદુસ્તાની’
નેટફ્લિક્સે નવી પીરિયડ ડ્રામા સીરિઝ ‘હમ હિંદુસ્તાની’નો ફર્સ્ટ-લૂક અને ટીઝર તાજેતરમાં જાહેર કર્યું છે. આ સીરિઝમાં સૈફ અલી ખાન અને પ્રતીક ગાંધી મુખ્ય પાત્રમાં છે. આ સાથે સાઉથની અભિનેત્રી મિમી ચક્રવર્તીનું હિન્દી સીરીઝમાં પદાર્પણ પણ થઇ રહ્યું છે. આ સિરીઝમાં નેશનલ એવોર્ડ વિજેતા ગુજરાતી અભિનેત્રી શ્રદ્ધા ડાંગર પણ જોવા મળશે. ‘હમ હિંદુસ્તાની’ ભારતની પ્રથમ સામાન્ય ચૂંટણીની કહાની રજૂ કરશે, જે 1950ના શરૂઆતના વર્ષોમાં યોજાઈ હતી. આ કહાની આઝાદી પછીના વર્ષોની છે. આ સીરિઝમાં એવા અધિકારીઓની કહાની બતાવવામાં આવશે, જેઓ સીમિત સાધનો, વહીવટી મુશ્કેલીઓ અને રાજકીય દબાણ વચ્ચે દરેક નાગરિકને મતાધિકાર મળે તે માટે સંઘર્ષ કરે છે. આ વાર્તા પાયાના સ્તરે કામ કરનારા લોકોને ઉજાગર કરે છે અને ભારતની લોકશાહી પાયાની રચનામાં થયેલા વિશાળ પ્રયાસોને દર્શાવે છે. આ સીરિઝમાં દીપક ડોબ્રીયાલ અને સારિકા પણ જોવા મળશે. ‘હમ હિંદુસ્તાની’ના લેખક અને દિગ્દર્શક રાહુલ ધોળકિયા કરી રહ્યા છે.
આર. માધવનની ‘લેગસી’
તાજેતરમાં પદ્મશ્રી સન્માનિત આર. માધવન ‘લેગસી’ નામની તમિલ ભાષાની નેટફ્લિક્સ ક્રાઈમ સીરિઝમાં મુખ્ય રોલમાં જોવા મળશે. આ સીરિઝમાં એક વૃદ્ધ માફિયા સરદારની કહાની કહે છે, જે પોતાના સામ્રાજ્યને બચાવવા માટે યોગ્ય વારસદાર શોધી રહ્યો છે. આ સીરિઝમાં નિમિષા સજાયન, ગુલશન દેવૈયા અને ગૌતમ કાર્તિક પણ છે. નેટફ્લિક્સે ઇન્સ્ટાગ્રામ પર ફર્સ્ટ-લુક ટીઝર સાથે લખ્યું, “સામ્રાજ્ય છે, સિંહાસન છે, બધું છે. પરંતુ એ સ્થાન માટે લાયક કોણ છે? ‘લેગસી’ જુઓ, જલ્દી આવી રહી છે—તમિલ, હિન્દી, તેલુગુ, કન્નડ અને મલયાલમમાં.”
