ભૂતકાળમાં જ્યારે મુંબઈમાં અંડરવર્લ્ડનો દબદબો હતો ત્યારે તેના કેન્દ્રિત અનેક ફિલ્મોનું નિર્માણ બોલીવૂડમાં થયું હતું. તાજેતરમાં રીલીઝ થયેલી ‘ઓ રોમિયો’ પણ તે વિષયક જ ફિલ્મ છે. ઓ રોમિયો ફિલ્મ શરૂઆતથી જ વિવાદાસ્પદ રહી છે. કહેવાય છે કે આ ફિલ્મ હુસૈન ઉસ્ત્રા પર આધારિત છે. નડિયાદવાલા ગ્રાન્ડસન એન્ટરટેઈનમેન્ટે આ ફિલ્મનું નિર્માણ કર્યું છે અને દિગ્દર્શન અને સંગીત વિશાલ ભારદ્વાજનું છે.
આ ફિલ્મમાં એક એવી કહાની છે જેમાં પ્રથમ ભાગમાં દર્શકોને પાત્રોની નજીક લાવવામાં આવે છે અને પછી બીજા ભાગમાં તેમની વચ્ચે છુપાયેલા રહસ્યો જાહેર થાય છે. ફિલ્મની કહાની મુજબ, મુંબઇમાં 1995ના અરસામાં ગુનાખોરી અને સત્તાનો ખેલ ચરમસીમાએ છે. શાહિદ કપૂર (ઉસ્તરા) ખતરનાક કિલરની ભૂમિકામાં છે, જે દરિયા કિનારે એક જૂના જહાજમાં રહે છે. તેના પોતાના નિયમો છે.
ઇન્સ્પેક્ટર ખાન (નાના પાટેકર) સાથે તેનો સંબંધ પણ અલગ પ્રકારનો છે. ઉસ્તરાના જીવનમાં અફશાં (તૃપ્તિ ડિમરી) પ્રવેશે છે. અફશાં કોઇની સોપારી આપવા આવી છે. ઉસ્તરા અને અફશાં વચ્ચે એક વિચિત્ર સંબંધ સર્જાય છે, જેમાં વિશ્વાસ પણ છે અને શંકા પણ છે.
ફિલ્મના બીજા ભાગમાં શાહિદ અને તૃપ્તિના પાત્રો વચ્ચે છુપાયેલું રહસ્ય ખુલે છે. અવિનાશ તિવારી ગેંગસ્ટર જલાલના રોલમાં જોવા મળે છે. આ સિવાય ફિલ્મમાં અરુણા ઇરાની, ફરીદા જલાલ, તમન્ના ભાટિયા, વિક્રાંત મેસી અને દિશા પાટણી પણ સીમિત ભૂમિકામાં છે. ફરીદા જલાલ શાહિદ કપૂરની દાદીની અને અરુણા ઇરાની મેડમની ભૂમિકા ભજવે છે.
